Vetëm një gol në tri ndeshje të javës së 7-të të Superiores/ Vllaznia merr kreun, Tirana ngec sërish

Sot u zhvilluan tri përballje të vlefshme për javën e shtatë të Kategorisë Superiore. Spektakli i golave mungoi, pasi vetëm një rrjetë u tund në të gjitha sfidat dhe ajo ishte një autogol, që i dha fitoren dhe tri pikë të arta Vllaznisë në transfertë ndaj Bylisit.

Përballja në Ballsh u mbyll 0-1, pas një autogoli të Peraltës, duke i dhënë kuqebluve një fitore të rëndësishme, që i çon në krye të renditjes. Ndërkohë, dy sfidat e tjera përfunduan pa gola. Tirana nuk arriti të dalë nga zona e ftohtë, pasi barazoi 0-0 me Teutën, ndërsa Egnatia nuk shkoi më shumë se një pikë ndaj Dinamos në një tjetër barazim pa rrjeta.

Pas këtyre rezultateve, Vllaznia kryeson me 14 pikë, dy më shumë se Egnatia. Më pas renditen Dinamo, Teuta dhe Elbasani me nga 11 pikë. Tirana dhe Bylisi mbeten në kuotën e 6 pikëve dhe vazhdojnë të qëndrojnë në fundin e tabelës.

Java e shtatë mbyllet nesër me dy duele të tjera interesante: Flamurtari-Partizani dhe Elbasani-Vora, që priten të ndikojnë ndjeshëm në ecurinë e renditjes.