Zyrtare: Publikohen tarifat për kalimin në tunelin e Llogorasë, nis pagesa për përdoruesit

Kanë hyrë zyrtarisht në fuqi tarifat që do të aplikohen për kalimin në tunelin e Llogorasë, duke shënuar një fazë të re në përdorimin e kësaj vepre infrastrukturore. Vendimi është formalizuar përmes një udhëzimi të përbashkët të nënshkruar nga zëvendëskryeministrja dhe ministrja e Infrastrukturës dhe Energjisë, Belinda Balluku, si dhe ministri i Financave, Petrit Malaj.

Udhëzimi është botuar në Fletoren Zyrtare dhe përcakton tarifat që do të paguhen nga përdoruesit, të cilat ndahen në pesë kategori të ndryshme automjetesh. Çmimet variojnë nga 100 lekë deri në 5,000 lekë dhe përfshijnë edhe TVSH-në.

Skema e tarifave për përdorimin e tunelit të Llogorasë:

• 100 lekë: Motoçikleta dhe mjete me dy rrota

• 250 lekë: Automjete të lehta (makina pasagjerësh, furgonë të vegjël, deri në dy boshte dhe lartësi deri në 1.30 metra)

• 500 lekë: Automjete me rimorkio ose karavan, me më shumë se dy boshte dhe lartësi deri në 1.30 metra

• 1,000 lekë: Furgonë të mëdhenj dhe minibusë, me dy ose më shumë boshte dhe lartësi mbi 1.30 metra

• 5,000 lekë: Autobusë dhe kamionë të rëndë, me tre ose më shumë boshte dhe lartësi mbi 1.30 metra

  
  

Për përdoruesit e rregullt, që do të kalojnë shpesh në tunel, do të krijohet një skemë me tarifa me parapagim (abonim), e cila do të hyjë në fuqi brenda gjashtë muajve nga hyrja në fuqi e udhëzimit.

Kush përjashtohet nga pagesa

Nga tarifimi përjashtohen plotësisht automjetet dhe përdoruesit që janë në kryerje të detyrës apo që përfshihen në kategori të veçanta, si më poshtë:

• Automjetet e Policisë Rrugore, ambulancat dhe mjetet zjarrfikëse

• Mjetet ushtarake dhe ato të NATO-s

• Automjetet e punonjësve të Autoritetit Rrugor Shqiptar dhe Entit Kombëtar të Operimit Rrugor, gjatë përmbushjes së detyrave

• Personat me status invalidi, kur automjetet i përdorin për nevoja personale

  
  

Ky vendim i ri vjen në kuadër të vendosjes së një skeme të qëndrueshme financimi dhe mirëmbajtjeje për tunelin e Llogorasë, një ndër projektet më të rëndësishme infrastrukturore të viteve të fundit.

“KORÇA BOOM”