Çfarë po ndodh me Pogradecin? Analizë dhe reflektime / Shkrim nga Redi Dandallaku

KF Pogradeci ndodhet në një moment reflektimi pas largimit të trajnerit Ardian Mema. Sipas portalit kategoritë.e.shqipërisë, Mema dha dorëheqjen pas një takimi me presidentin e klubit në Tiranë, ku u diskutuan paraqitjet e fundit të skuadrës. Palët u ndanë me mirëkuptim, ndërsa tani klubit i duhet të gjejë një trajner të ri për të vijuar sezonin.

Megjithatë, pyetja që ngrihet në opinionin sportiv të qytetit është nëse problemi qëndron vetëm te stoli i trajnerit apo pasqyron diçka më të thellë brenda strukturës së klubit.

Sezoni i kaluar solli një kthesë të rëndësishme për Pogradecin. Pas një nisjeje të dobët dhe shkarkimit të Samuel Nikajt, ardhja e Memës solli stabilitet dhe një identitet të qartë në lojë. Me skemën 4-3-3 dhe pasime të shkurtra, që janë tipike për stilin pogradecar, ekipi arriti deri në finalen e "play-off"-it, ku u mund minimalisht 1-0 nga Tirana, një sukses i konsiderueshëm për klubin.

Por sezoni aktual ka qenë më i vështirë. Në merkaton e verës u larguan disa lojtarë kyç si Shkulaku, Berberi, Hysenllari dhe Alidema – emra që kanë mbajtur peshën e ekipit për vite me radhë. Në vend të tyre u afruan futbollistë më pak të njohur ose me përvojë të madhe, por në fundin e karrierës së tyre.

Çështja qëndron te mënyra se si u bënë këto transferime. A ishte kjo një zgjedhje e trajnerit Mema apo një vendimmarrje tjetër brenda klubit? Për momentin, kjo mbetet e paqartë për tifozët dhe ekspertët e futbollit.

Në çdo rast, faji për ecurinë jo të mirë të skuadrës nuk duhet t’i përket vetëm trajnerit. Sidomos për një ekip që konsiderohet ndër më të paguarit në Kategorinë e Parë, përgjegjësia duhet të ndahet më gjerë. Kërkimi i llogaridhënies dhe analizat duhet të përfshijnë gjithë strukturën drejtuese të klubit, jo vetëm stolin e trajnerit.

"Korça Boom"