14-vjeçari që v*au Martin Canin mbetet në institucionin e të miturve, prokuroria kërkon 25 vite burg

Prokuroria e Tiranës ka dhënë pretencën për të miturin Mario Përlleshaj, i akuzuar për vrasjen e Martin Canit, duke kërkuar dënimin me 25 vite burg për veprën penale “vrasje në rrethana cilësuese kundër dy ose më shumë personave”.

Megjithatë, prokurorja Alma Felaj sqaroi se gjykata ka të drejtë të marrë parasysh kodin penal për të mitur, konkretisht nenin 97, i cili përcakton se dënimi në këto kushte nuk mund të kalojë 12 vite. Kjo do të thotë se nëse gjykata e konsideron autorin të mitur, dënimi për vrasjen e Martin Canit dhe plagosjen e Luis Meçja mund të reduktohet në gjysmën e shumës fillestare.

Në seancën e ardhshme do të paraqiten konkluzionet e mbrojtjes, si dhe qëndrimi i palëve të dëmtuara. Kujtojmë se gjatë përleshjes mes të miturve, vetë autori mbeti i plagosur. Prej nëntorit të vitit 2024, 14-vjeçari Mario Përlleshaj mbahet në institucionin e të miturve në Kavajë.

Ngjarja e rëndë kishte ndodhur pranë shkollës “Fan Noli” më 18 nëntor të vitit të kaluar. Pak ditë më parë, adoleshentët ishin përplasur mes tyre dhe shkolla pretendoi se kishte ndërmarrë masat për pajtimin e tyre, por konflikti vijoi sapo fëmijët larguan nga ambientet e shkollës, duke kulmuar në tragjedinë që preku komunitetin.

Nesër, më 18 nëntor, bëhet një vit nga vrasja e Martin Canit dhe plagosja e Luis Meçja, dhe për këtë janë planifikuar aktivitete përkujtimore pranë shkollës, ku prindër dhe aktivistë do të mblidhen për të kujtuar ngjarjen.

"KORCA BOOM"