5 shtatori, dita e shenjtërimit të Nënë Terezës, një jetë në shërbim të njerëzimit

Më 5 shtator 2016, Papa Françesku e shenjtëroi Nënë Terezën, murgeshën katolike me origjinë shqiptare, duke e njohur zyrtarisht si shenjtore. Data e shenjtërimit përkon me ditën e ndarjes së saj nga jeta në vitin 1997, duke e kthyer këtë ditë në një përkujtim të veçantë për jetën dhe veprën e jashtëzakonshme të Nënë Terezës.

Nënë Tereza, e cila lindi më 26 gusht 1910 në Shkup me emrin Anjezë Gonxhe Bojaxhiu, kaloi pjesën më të madhe të jetës së saj në Kalkutë të Indisë, ku shërbeu me përkushtim të madh ndaj fëmijëve dhe të varfërve. Për kontributin e saj humanitar, ajo u nderua me Çmimin Nobel të Paqes.

Papa Françesku njohu mrekullitë që i atribuohen Nënë Terezës, duke përfshirë shërimin e një gruaje nga kanceri dhe të një personi tjetër në Brazil, të prekur nga tumori, si dëshmi e shenjtërisë së saj.

Në Shqipëri, data 5 shtator është shpallur festë zyrtare në nder të Shenjtores shqiptare, duke zëvendësuar datën 19 shtator, ditën e lumturimit të saj. Këshilli i Ministrave miratoi këtë ndryshim për të theksuar rëndësinë e shenjtërimit në kalendarin fetar dhe kombëtar.

Veprat dhe jeta e Nënë Terezës vazhdojnë të jenë një frymëzim global për solidaritet dhe ndihmë ndaj më të varfërve, duke nxitur njerëzit në të gjithë botën të ndjekin shembullin e saj të dashurisë dhe shërbimit.

“KORÇA BOOM”