Akademia e të Drejtave të Njeriut dhe Minoriteteve, Voskopojë 2025 – Një platformë për edukimin dhe angazhimin e të rinjve

Në ambientet piktoreske të Voskopojës u zhvillua me sukses edicioni i radhës i Akademisë së të Drejtave të Njeriut dhe Minoriteteve 2025, një nismë që përfshin të rinj nga e gjithë Shqipëria në një trajnim intensiv pesëditor mbi të drejtat e njeriut, etikën dhe rolin e medias në shoqëri.

Në këtë edicion, një rol të veçantë luajti gazetari, pedagogu dhe juristi Armand Braho, i cili, së bashku me një grup të rinjsh, trajtoi çështje thelbësore si edukimi mediatik dhe etika profesionale në media.

Gjatë punës me grupet pjesëmarrëse, të rinjtë realizuan tre materiale multimediale me fokus të drejtat e njeriut, duke reflektuar mbi realitete të ndryshme dhe duke përcjellë mesazhe të fuqishme ndërgjegjësuese.

Momenti kulmor i akademisë ishte shfaqja e filmit dokumentar “Kthimi i Zonjave”, një prodhim i Armand Brahos, që sjell në vëmendje rrëfimet tronditëse të grave që kanë mbijetuar internimin dhe dhunën gjatë diktaturës komuniste. Ky dokumentar është mbështetur nga AWA – Albanian Women in Audiovisual, në bashkëpunim me Scidev dhe me financim nga Bashkimi Europian.

Akademia e Voskopojës, edhe këtë vit, dëshmoi se investimi në edukimin e të rinjve është çelësi për një shoqëri më të drejtë dhe të vetëdijshme. Aktiviteti u organizua nga Albanian Human Rights Group, në bashkëpunim me Rrjetin e Organizatave “Zëri i të Rinjve”, dhe u mbështet nga UNFPA Albania.

Me përkushtim dhe profesionalizëm, kjo akademi vazhdon të jetë një model frymëzimi dhe formimi për brezin e ri, në ndërtimin e një të ardhmeje ku respektohen dhe mbrohen në mënyrë të qëndrueshme të drejtat e njeriut.

Click Me

“KORÇA BOOM”