Kolonjë: Frikë për blegtorinë, fshati Qinam kundër projektit solar

Banorët e fshatit Qinam, në bashkinë e Kolonjës, janë ngritur këtë të shtunë në protestë kundër projektit për instalimin e paneleve diellore në zonat e kullotave. Sipas tyre, projekti rrezikon të prekë drejtpërdrejt ekonominë e fshatit, e cila mbështetet kryesisht në blegtori dhe bujqësi.

Gjatë protestës, banorët u shprehën se ndonëse bashkia ka zhvilluar disa takime informuese, vendimet e marra deri më tani nuk pasqyrojnë shqetësimet e tyre reale. Ata theksuan se ndihen të përjashtuar nga procesi dhe të pambrojtur nga institucionet, pavarësisht ankesave të përsëritura.

Sipas banorëve, kullotat dhe arat që parashikohen të zëvendësohen me panele janë të ndara prej brezash mes familjeve të fshatit dhe aty kullosin rreth 4000 krerë bagëti, përfshirë 600 lopë. Heqja e këtyre sipërfaqeve do të paralizonte ciklin bujqësor dhe blegtoral të zonës.

Një prej fermerëve u shpreh se vendosja e paneleve mund të detyrojë largimin e familjeve të fundit që sigurojnë jetesën nga blegtoria. Banorët i bëjnë thirrje institucioneve për ndërhyrje urgjente, duke theksuar se mbrojtja e kullotave është e vetmja mënyrë për të ruajtur ekonominë dhe jetën në fshat.

"KORCA BOOM"