Alarm! Zjarr pranë Teqesë së Kuzum Babasë, rrezikohen banesat

Një zjarr ka rënë pasditen e kësaj të mërkure në kodrën e Kuzum Babasë, në Vlorë, duke përfshirë një sipërfaqe me shkurre dhe bimësi.

Menjëherë pas sinjalizimit, në vendngjarje kanë mbërritur forcat e Shërbimit Zjarrfikës të Vlorës, të cilat po punojnë për izolimin dhe shuarjen e flakëve, me qëllim parandalimin e përhapjes së tyre në zonat përreth.

Situata paraqitet shqetësuese pasi pranë vatrës së zjarrit ndodhen banesa, si dhe Teqeja e Kuzum Babasë, një prej objekteve me rëndësi fetare, historike dhe turistike për qytetin e Vlorës.

Deri më tani nuk raportohet për persona të lënduar apo dëme në banesa, ndërsa autoritetet vijojnë përpjekjet për ta vënë zjarrin nën kontroll.

Shkaqet e rënies së zjarrit mbeten ende të paqarta dhe pritet të zbardhen pas përfundimit të ndërhyrjes së shërbimeve përkatëse.

“KORÇA BOOM”