Alban Bushi shpall listën e U-21: mungesa të rëndësishme, por edhe një prurje e re

Trajneri i Kombëtares U-21, Alban Bushi, ka komentuar listën e lojtarëve të grumbulluar për ndeshjet e radhës, duke folur për mungesat, risitë në skuadër dhe përgatitjet në kuadër të Kampionatit Europian U-21.

“Lista është pothuajse e njëjtë me atë të ndeshjes së fundit ndaj San Marinos. Ka shumë pak ndryshime. Kemi dy mungesa të rëndësishme, Zylyf Muçën, mbrojtësin e djathtë, dhe Enes Osmanin, mbrojtësin e majtë, të cilët janë zëvendësuar nga Vokrri dhe disa lojtarë të tjerë,” deklaroi Bushi.

Trajneri ndaloi veçanërisht te prurja e re në skuadër: “Mendoj që Vokrri është një përforcim shumë i rëndësishëm për ne. Dua ta falënderoj që zgjodhi Shqipërinë. Është një lojtar me shumë cilësi dhe besoj se do të na ndihmojë ndjeshëm.”

Në vijim, Bushi theksoi seriozitetin me të cilin ekipi e merr çdo përballje:“Për ne nuk ka ndeshje miqësore, e kam thënë edhe më parë. I marrim shumë seriozisht sepse janë prova të rëndësishme për ne, sikur të ishin zyrtare, pasi na presin ekipe shumë të forta në Europian.”

Lista e lojtarëve të grumbulluar:

Portierë: Giulio Veliaj, Endri Dema, Aron Jukaj

Mbrojtës: Fabjan Përndreca, Arlind Kurti, Gabriel Ramaj, Adi Kurti, Elton Fikaj, Ervin Bashi, Aurel Marku, Ermis Selimaj, Diar Vokrri

Mesfushorë: Gjergji Kote, Feta Fetai, Aidon Shehu, Etnik Brruti, Burak Alili, Dario Daka

Sulmues: Kevin Dodaj, Erald Maksuti, Elmedin Rama, Rrok Toma, Ermir Rashica

"KORCA BOOM"