Arben Malaj përplaset me Murrizin: Pse nuk dhe dorëheqjen kur PD bllokoi hetimet për naftën

Eksperti i ekonomisë, Arben Malaj ka ndarë sot një reagim ndaj ish-deputetit Myslim Murrizi.

Përmes një reagimi në rrjetet sociale, Malaj e pyet Murrizin se psenuk dha dorëheqjen kur nisën hetimet për rafineritë e naftës në Ballsh, në një kohë kur PD ishte në pushtet dhe urdhëroi largimin e tatimorëve nga Uzina e Përpunimit të Thellë të Naftës.

Malaj i kujton Murrizit se si deputet në ato vite, kishte të gjithë mundësinë për të reaguar siç duhet, por zgjedh të luajë rolin e heroit.

“S’po e kuptoj dot pse kaq heroik Myslymi. Pse kaq poshterues ndaj gjithë të tjerëve, “heroi” mediatik ish-kolegu Myslymi? Kemi folur, shoku Myslym. Kemi folur në parlament, kemi folur në media, kemi apeluar që SPAK duhet të hetojë me prioritet falimentimin e përshpejtuar të Uzines të Përpunimit të Thellë të Naftës.

Pse nuk dhe dorëheqje, Myslym, kur autoritetet tatimore gjate qeverisjes së PD-së, nisën hetim të thelluar për rafineritë e naftës dhe policia e partise tuaj i bllokoj dhe i perzuri tatimoret?

Ish-ministri juaj i Financave urdhëroi ndërprerjen e hetimeve? Pse nuk protestove në atë ditë? Pse nuk i bëre një apel të hapur ministrit të Financave dhe kryeministrit tënd?

Po, ne kemi folur, por asnjëherë me gjuhë “alabakësh”, por me argumenta thellesisht profesionale. Jo me vetë-personalizim si hero.

Aty ke qenë deputet pas vitit 2005, kishe të gjithë të drejtën dhe mundësitë ligjore jo thjesht të flisje, por edhe të hetoje çdo vjedhje dhe t’u nxirrje ujë të zi “të zinjve” politikë që futën thellë duart në paratë e zeza të UPTHN-së në Ballsh.

Nuk kam asgjë personale, as po e bëj për të mbrojtur ndonjë, sepse, fatmirësisht, hajdutët dhe të babëziturit, përditë e më shumë, do të jenë publikë.

Jam krenar që edhe pas 20 viteve dhe pas shpifjeve pa fund të PD-së – ndaj të cilave ti asnjëherë nuk reagove pse e bazonin luftën politike vetëm tek shpifjet ndaj kundërshtarëve politikë – edhe pas hetimeve politike të ish-ministrit të Financave të PD-së, pas vitit 2005 nuk gjetët dot asnjë rast që të kisha abuzuar me detyrën, e aq më pak të kisha pasuruar vëllezërit, motrat dhe familjarët e mi, të mirë-arsimuar, me zyra avokatie apo konsulence.

I dashur Murrizi, më qetë, me më pak vulgaritet, me më shumë argumente logjike, me më shumë këmbëngulje morale dhe ligjore.

Kredibiliteti publik nuk fitohet nga vetë-personalizimi si “më i ndershmi i shekullit të 21-të”, por nga arritjet konkrete në luftën kundër korrupsionit dhe kapjes së shtetit, që nisi pas rikthimit të PD-së në pushtet në 2005 dhe u thellua e u zgjerua, madje në nivele kërcënuese për ekonominë dhe demokracinë, nga disa rilindas të babëzitur dhe oligarkë të pangopur, të dyja bashkë dhe reciprokisht për pushtet ekonomik dhe politik.

Çoje deri në fund një akuzë. Murriz, heto me ekspertë të jashtëm, fito luftën qoftë edhe në një rast të vetëm.

Kjo do të jetë fitore politike, publike, që do të ndihmojë të arrish edhe fitore në mënyrë etike”,-shkruan Malaj./CNA

“KORÇA BOOM”