Belinda Balluku thirret nga SPAK, Edi Rama reagon nga Berlini: “Drejtësia bën punën e saj”

Zëvendëskryeministrja dhe ministrja e Infrastrukturës dhe Energjisë, Belinda Balluku, është thirrur të hënën në Prokurorinë e Posaçme Kundër Korrupsionit dhe Krimit të Organizuar (SPAK).Burime jozyrtare bëjnë me dije se fletëthirrja mban firmën e prokurorit Dritan Prençi, megjithatë deri më tani nuk është bërë publike arsyeja zyrtare e paraqitjes së saj në këtë institucion.

Nga ana e Prokurorisë së Posaçme nuk ka asnjë njoftim publik në lidhje me zhvillimin, çka ka shtuar interesin dhe pyetjet mbi natyrën e hetimit që mund të përfshijë numrin dy të qeverisë.

Ndërkohë, kryeministri Edi Rama, i cili ndodhet në Berlin për të marrë pjesë në një forum ndërkombëtar, ka dhënë një reagim të shkurtër për median gjermane Deutsche Welle.“Nuk kam asnjë koment për asnjë rast. Siç e kam thënë më parë, ne kemi punën tonë, drejtësia punën e vet. Derisa çështje të caktuara marrin formën e tyre të prerë, të gjithë njerëzit janë të pafajshëm dhe të padënueshëm nga gjykata popullore apo politike,” – u shpreh Rama, duke ruajtur qëndrimin e tij të zakonshëm për mosndërhyrje në proceset gjyqësore.

Thirrja e Ballukut në SPAK vjen në një moment kur disa zyrtarë të lartë të qeverisë janë nën hetim për çështje që lidhen me tendera publikë dhe procedura administrative. Megjithatë, deri në daljen e një deklarate zyrtare nga SPAK, mbetet e paqartë nëse bëhet fjalë për një proces formal hetimor apo për dhënie shpjegimesh në kuadër të ndonjë dosjeje ekzistuese.

"KORCA BOOM"