Berisha “dhuron” deputetë: Meta krijon grup parlamentar me hua nga Partia Demokratike

Sali Berisha duket se vijon të jetë mbështetësi më i fortë i Ilir Metës, edhe pas humbjes në zgjedhje të koalicionit opozitar. Pavarësisht rezultatit të dobët të Partisë së Lirisë, Meta do të ketë zë në Kuvend falë “ndihmës” që i jep aleati i vjetër, Berisha.

Pas katër mandateve të sigurta të dhëna më parë, tashmë Partia Demokratike do të transferojë edhe tre deputetë të tjerë drejt Partisë së Lirisë, për të plotësuar numrin minimal prej 7 deputetësh, të nevojshëm për krijimin e një grupi parlamentar.

Lajmi është konfirmuar nga Sekretari i Përgjithshëm i Partisë së Lirisë, Tedi Blushi, i cili në një intervistë për Top Channel deklaroi:

“Ne kemi rënë dakord që në rast se forca jonë politike nuk do kalonte pragun prej 7 deputetësh për krijimin e grupit parlamentar, atëherë do marrim tre deputetë nga Partia Demokratike. Zëri i zotit Meta do dëgjohet fuqishëm në Kuvendin e ri në çdo seancë dhe mbledhje të komisioneve.”

Krijimi i një grupi parlamentar sjell benefite të shumta, përfshirë minutazh më të madh për debat, të drejtë për zyra, staf dhe pjesëmarrje aktive në strukturat e Kuvendit – elementë që Partia e Lirisë i konsideron si mjet për të forcuar aksionin opozitar, edhe në kushtet ku Ilir Meta do ta udhëheqë partinë nga burgu.

Nga ana tjetër, Sali Berisha, ende pa një drejtim të qartë për Partinë Demokratike pas zgjedhjeve, ka paralajmëruar mbledhje të forumeve për të vendosur për aksionin opozitar.

“E vetmja rrugë që duhet të ndjekë opozita është asnjë hap pas. I referohem betejës së Stalingradit. Nuk do të ketë bojkot apo dorëzim mandatesh nga Partia e Lirisë. Sigurisht do ketë protesta dhe aksion të fortë politik,” deklaroi Berisha.

Gazetarja e Top Channel, Elda Menga, raporton se e njëjta praktikë do të aplikohet edhe me aleatët e tjerë të Berishës, si Mediu, Dule apo deputetja e Dukës, duke bërë që opozita në Kuvend të përbëhet nga të paktën tre grupe parlamentare, të ndihmuara nga mandatarë të transferuar nga listat e Partisë Demokratike.

“KORÇA BOOM”