Bes Kallaku flet hapur pas ndarjes: “E shkuara ime është e vdekur”

Aktori i njohur i humorit, Bes Kallaku, ka bërë deklarata të forta dhe mjaft personale në një intervistë me Grida Dumën, rreth një vit pas ndarjes së bujshme nga këngëtarja Xhensila Myrtezaj. Ndërsa divorci i tyre vijon të mbetet një temë e diskutuar në publik, Kallaku ka zgjedhur të flasë hapur për zhgënjimet, besimin dhe mënyrën se si e sheh sot jetën.

Gjatë bisedës, aktori u shpreh se nuk jeton më me të shkuarën, duke theksuar se për të ajo është mbyllur përfundimisht. Sipas tij, fokusi është vetëm te e tashmja dhe te njerëzit që i japin kuptim jetës së tij.

“E shkuara ime është e vdekur. Unë po jetoj të sotmen. Unë nuk jam askushi, por prezenca ime në jetën e disa njerëzve ua ka bërë jetën më të bukur”, u shpreh Kallaku gjatë intervistës.

Me tone zhgënjimi dhe reflektimi, ai la të kuptohet se ka përjetuar mosmirënjohje nga persona të afërt, duke përdorur një gjuhë të drejtpërdrejtë dhe emocionalisht të ngarkuar.

“Përveçse ju kam dhënë dorën, ju kam dhënë edhe bukën”, tha aktori, duke nënvizuar ndjesinë e zhgënjimit ndaj atyre që, sipas tij, nuk kanë vlerësuar mbështetjen e dhënë.

Deklaratat e Bes Kallakut kanë rikthyer vëmendjen publike mbi jetën e tij personale, duke nxitur reagime dhe diskutime të shumta në rrjetet sociale.

"KORCA BOOM"