Beteja për Tiranën nis tani: Boçi përmend katër emra surprizë si kandidatë të opozitës

Nënkryetari i Partisë Demokratike dhe deputeti i opozitës, Luçiano Boçi, ka deklaruar se kandidati që opozita do të përzgjedhë për garën në Bashkinë e Tiranës duhet të ketë një profil të balancuar mes dimensionit publik dhe atij politik.

Gjatë një deklarate për mediat, Boçi u ndal edhe te sfidat që mbart përzgjedhja e kandidatit për kryeqytetin, duke e cilësuar procesin si një "ekuacion me shumë faktorë", por që sipas tij do të ketë një zgjidhje të mirëfinalizuar.

“Gjetja e zgjidhjes në këtë ekuacion me shumë faktorë të barabartë është disi jo e lehtë, por që do të ketë një zgjidhje. Ka arsyetimet e veta çdo lloj formati i kandidatit”, u shpreh Boçi.

Ai theksoi se Tirana është një qytet me shumë specifika, për shkak të përbërjes së larmishme të popullsisë dhe peshës politike që mban në nivel kombëtar.

“Tirana ka specifikën e vet, pasi është një konglomerat prurjesh nga e gjithë Shqipëria, konglomerat shtresash, përfaqësues të botëve të ndryshme, të biznesit dhe shoqërisë. Kjo situatë imponon, edhe për shkak të klimës politike ku ndodhemi, një kandidat që të jetë më shumë i shfaqur në dimensionin publik, por të mos i mungojë edhe dimensioni politik”, tha Boçi.

Në diskutim, ai përmendi edhe disa emra potencialë që, sipas tij, mund të përfaqësojnë me sukses opozitën në këtë garë, si: analisti Fatos Lubonja, Ilir Alimehmeti, Jorida Tabaku dhe Dhurata Çupi.

Përzgjedhja e kandidatit të opozitës për Bashkinë e Tiranës pritet të jetë një nga vendimet më të rëndësishme për aksionin opozitar në prag të zgjedhjeve vendore.

“KORÇA BOOM”