Del dëshmia kyç nga ngjarja tragjike në Gjykatën e Apelit/ Rrëfimi që trondit opinionin

Po dalin dëshmi të reja në lidhje me ngjarjen e rëndë që ndodhi dy ditë më parë në sallën e gjyqit të Gjykatës së Apelit, ku gjyqtari Astrit Kalaja u vra me armë zjarri teksa ishte në krye të detyrës.

Një nga personat e plagosur dhe njëherazi dëshmitar kyç i ngjarjes, Ervis Kurtaj, ka rrëfyer momentet dramatike të ndodhura brenda sallës së gjyqit, ku ai ndodhej si palë në një proces civil së bashku me babanë e tij, Rakip Kurtaj. Të dy përballeshin ligjërisht me familjen Shkambi, në një çështje pronësie.

Sipas dëshmisë së dhënë nga Kurtaj, ngjarja ka ndodhur menjëherë pasi gjyqtari Kalaja shpalli vendimin gjyqësor, i cili ishte në favor të tyre.

“Në atë moment, një nga pjesëtarët e palës kundërshtare, Elvis Shkambi, u ngrit nga vendi dhe iu afrua gjyqtarit, duke e qëlluar disa herë me armë zjarri,” – tha ai në dëshminë e dhënë për hetuesit.

Dëshmitari shton se sapo dëgjuan të shtënat, ai dhe babai i tij tentuan të largoheshin me shpejtësi nga salla.

“E kapa babain për dore dhe u nisëm drejt derës. Në atë moment, autori u kthye dhe qëlloi në drejtimin tonë. U plagosëm të dy, por arritëm të dilnim në korridor,” – shtoi Ervis Kurtaj.

Të plagosurit u transportuan menjëherë drejt Spitalit të Traumës, ku morën ndihmën e nevojshme mjekësore. Burime nga spitali konfirmojnë se gjendja e tyre shëndetësore është jashtë rrezikut për jetën.

Ndërkohë, hetimet për ngjarjen po vijojnë me intensitet të lartë. Prokuroria është duke analizuar dëshmitë, pamjet e kamerave të sigurisë dhe po kryen veprime të zgjeruara hetimore për të dokumentuar plotësisht rrethanat e vrasjes së gjyqtarit Kalaja, një prej figurave të njohura të drejtësisë në vend.

Autori i dyshuar, Elvis Shkambi, është ndaluar menjëherë pas ngjarjes dhe ndodhet në paraburgim, ndërsa ndaj tij rëndojnë disa akuza të rënda, përfshirë vrasje me paramendim dhe plagosje të rëndë me dashje.

Tragjedia në sallën e gjyqit ka ngritur sërish alarmin për sigurinë në ambientet gjyqësore dhe ka shkaktuar reagime të forta në opinionin publik, ndërkohë që priten masa të reja nga autoritetet për të parandaluar përsëritjen e ngjarjeve të tilla në të ardhmen.

“KORÇA BOOM”