"Do përballemi si të barabartë”/ Kundërshtarët e Skënderbeut flasin pa komplekse

Burreli do ta nisë sezonin me një përballje të fortë në javën e parë të kampionatit, teksa udhëton drejt Korçës për t’u përballur me një nga emrat më të njohur të futbollit shqiptar, Skënderbeun. Një sfidë që pritet me interes dhe që do të jetë menjëherë një test i vështirë për matjanët.

Administratori i klubit, Marjan Lleshaj, u shpreh se ndonëse përballen me një rival me histori dhe cilësi, Burreli do të hyjë në fushë pa kompleks dhe me qëllimin për të luftuar denjësisht.

“Ndeshja në Korçë do të jetë e vështirë, pasi Skënderbeu ka një ekip shumë cilësor dhe në fakt nuk e meritonte rënien nga Kategoria Superiore.

Por tashmë kjo është një realitet, ndaj ne do të përballemi me ta si të barabartë, njësoj si me çdo kundërshtar tjetër. Kemi treguar se dimë të vlerësojmë dhe të luftojmë në çdo ndeshje. Shpresoj të jetë një sfidë fair-play dhe ta shijojmë, pavarësisht rezultatit,” u shpreh Lleshaj.

Burreli synon të tregojë që është gati për çdo rival dhe që nuk do të jetë një skuadër që thjesht merr pjesë, por që kërkon të ndërtojë një sezon dinjitoz në një kampionat që parashikohet mjaft i fortë dhe konkurrues.

“KORÇA BOOM”