E nisi në Korçë, tani spikat në Europë: Ish-sulmuesi i Skënderbeut rrëmben vëmendjen

Një tjetër fundjavë pozitive për legjionarët shqiptarë u mbyll me paraqitje të rëndësishme dhe nota të larta nga portali i specializuar në statistika sportive, “Sofascore”.

Në krye të listës qëndron mesfushori Enis Çokaj, i cili dha një asist vendimtar për fitoren e skuadrës së tij, Levadiakos, në kampionatin grek. Kontributi i tij i dha notën më të lartë mes legjionarëve shqiptarë për këtë javë.

Nazmi Gripshi, ish-sulmuesi i Skënderbeut dhe aktualisht pjesë e Astanës në Kazakistan, konfirmoi formën e mirë, duke asistuar në një tjetër fitore të skuadrës së tij. Ai u rendit i dyti në listë.

Juljan Shehu arriti të shënojë për ekipin e tij, por goli i tij nuk mjaftoi për të siguruar fitoren. Gjithsesi, paraqitja e tij u vlerësua me notën 7.9.

Myrto Uzuni ishte vendimtar për Austinin në MLS. Ai shënoi golin e fitores në minutën e 96-të, duke i siguruar skuadrës së tij tri pikë të arta dhe vendin e katërt në listën e më të mirëve.

Top 5-shja mbyllet me Ermir Rashicën, i cili bëri një paraqitje të qëndrueshme në fitoren e ekipit Metalist 1925, duke u vlerësuar pozitivisht për kontributin e tij në fushë.

Një javë e suksesshme për legjionarët, të cilët vazhdojnë të jenë ambasadorë të denjë të futbollit shqiptar në arenën ndërkombëtare.

“KORÇA BOOM”