EKSKLUZIVE/ SKËNDERBEU gjen mesfushor nga Guinea që luan në Francë. Ja kush pritet të vijë në Korçë

Ditë pas dite Skënderbeu sjell emra të rinj futbollistësh dhe duket se skuadra bardhekuqe është shumë aktive në këtë merkato vere, ndërkohë që trajneri Julian Ahmataj dhe stafi i tij e kanë ndarë mendjen që të formojnë sa më shpejt grupin në mënyrë që skuadra të jetë gati në startin e sezonit të ri.

Pas ditës së djeshme ku u konfirmua mbrojtësi grek shtatlartë Georgios Lagonidis, sot portali ynë “Korça Boom” zbulon edhe një tjetër afrim këtë herë në mesin e fushës.

Sipas transfermarkt Skënderbeu është në mbyllje të bisedimeve dhe pritet që të vijë mesfushori nga Guinea, Ousmane Drame. 25-vjeçari luan përpara mbrojtjes dhe ka luajtur në Guine me ekipe si, Horoya dhe Hafia, ndërkohë një vit më prë mbërriti në Francë ku u aktivizua me ekipin e ligës së tretë, Paris 13.

Po sipas transfermarkt, Drame vlen 100 mijë euro dhe është lojtar i lirë. Në fakt bisedimet me këtë futbollist janë drejt fundit dhe mesfushori në fjalë pritet që të përforcojë edhe më shumë mesin e fushës.

Tashmë presim vetëm fjalën e fundit të Skënderbeut për të zyrtarizuar edhe këtë afrim, ndërkohë që burime pranë klubit bëjnë me dije se mesfushori është me cilësi shumë të mira.

“KORÇA BOOM”