Evazion fiskal dhe shkelje shëndetësore në klinikë dentare, sekuestro 100 mijë euro mall

Një klinikë dentare në zonën e “Don Boskos” është zbuluar se ushtronte aktivitet të paligjshëm, duke kryer evazion fiskal dhe duke përdorur produkte të skaduara në trajtimet ndaj pacientëve.

Operacioni policor i koduar “Dentistry”, i ndërmarrë nga specialistët e Seksionit për Hetimin e Pastrimit të Parave dhe Aseteve Kriminale, u zhvillua si rezultat i informacioneve të siguruara në rrugë operative për veprimtari të paligjshme ekonomike dhe shkelje që cenonin shëndetin e qytetarëve.

Gjatë kontrollit të ushtruar në ambientet e klinikës u sekuestruan:

• 300 shishe me produkte dentare, shumica të skaduara,

• Fatura të pashoqëruara me dokumentacion zhdoganimi,

• Mandate të pafiskalizuara, me një vlerë totale të përllogaritur rreth 100 000 euro.

  
  

Në përfundim të ndërhyrjes u arrestua administratori i klinikës, shtetasi turk A. Y., 59 vjeç, ndërsa në gjendje të lirë janë proceduar:

• Koordinatorja e klinikës, shtetasja B. K., 35 vjeçe,

• Dy laborantët, L. S., 21 vjeçe dhe A. A., 42 vjeç.

  
  

Autoritetet vijojnë hetimet për të përcaktuar dëmin ekonomik të shkaktuar ndaj shtetit, përmes shmangies së detyrimeve tatimore. Materialet procedurale janë referuar Prokurorisë së Tiranës për veprime të mëtejshme ligjore.

“KORÇA BOOM”