Familja kallëzon mjekët për neglizhencë, v*dekja e pacientes shkon për hetim

Policia e Korçës ka nisur hetimet për vdekjen e një 49-vjeçareje, e cila ndërroi jetë ditën e djeshme në qytet. Gentiana Nano ishte paraqitur në urgjencën e spitalit të Korçës tre ditë më parë, për shkak të problemeve me frymëmarrjen. Pas mjekimit të parë dhe disa analizave, ajo u la të shkonte në shtëpi, megjithëse familjarët thonë se gjendja e saj nuk ishte përmirësuar.

Një ditë para ngjarjes, sipas familjes, ajo kishte shfaqur sërish shqetësime, ndërsa mëngjesin e djeshëm u gjet e pajetë në dhomë nga i biri dhe bashkëshorti. Djali i saj, Erdiol Nano, ka akuzuar mjekët e spitalit të Korçës për mungesë kujdesi dhe trajtim të papërshtatshëm.

Ai rrëfeu se nëna kishte ankesa të vazhdueshme, përfshirë lodhje të madhe dhe rrahje të larta të zemrës, por pavarësisht kësaj, mjekët e kishin nxjerrë nga spitali vetëm me disa mjekime. “Si mundet të lejosh një njeri të largohet kur thotë që nuk ndihet mirë?”, – ishte një prej pyetjeve që i riu u drejtua mjekëve, duke kërkuar përgjegjësi për atë që ndodhi.

Sipas policisë, familjarët kanë bërë kallëzim për dyshime mbi neglizhencë në trajtimin mjekësor të 49-vjeçares.

Materialet procedurale janë referuar në Prokurorinë e Korçës, e cila do të vlerësojë hapat e mëtejshëm hetimor dhe do të thërrasë për pyetje stafin mjekësor që ka qenë në shërbim gjatë ditëve të fundit.

"KORCA BOOM"