FIFA kompenson klubet, 11 mijë dollarë në ditë për skuadrat që kanë lojtarët të angazhuar në Kampionatin Botëror

FIFA ka bërë të ditur se klubet do të kompensohen me rreth 11 mijë dollarë në ditë për çdo lojtar të grumbulluar në Kupën e Botës 2026, turne që do të zhvillohet në Shtetet e Bashkuara të Amerikës, Kanada dhe Meksikë.

Vendimi konsiderohet një hap i rëndësishëm në raportet mes futbollit të klubeve dhe ekipeve kombëtare, pasi prej vitesh klubet kanë kërkuar kompensim financiar për periudhën kur lojtarët e tyre aktivizohen me përfaqësueset.

Garanci minimale për klubet

Sipas marrëveshjes së prezantuar nga FIFA, klubet do të përfitojnë një shumë minimale prej rreth 250 mijë dollarësh për çdo lojtar të angazhuar në turne, pavarësisht ecurisë së kombëtares së tij.

Kjo do të thotë se edhe në rastet kur një përfaqësuese eliminohet që në fazën e grupeve, klubi përkatës do të marrë kompensimin bazë. FIFA synon në këtë mënyrë të zbusë shqetësimet financiare të klubeve që lëshojnë futbollistët për aktivitetet ndërkombëtare.

Përfitime të mëdha për klubet europiane

Vendimi pritet të ndikojë veçanërisht te klubet e mëdha europiane, të cilat zakonisht kanë numrin më të lartë të lojtarëve në kombëtare.

Skuadra si Reali i Madridit, Mançester Siti apo Bajerni i Mynihut mund të përfitojnë shuma të konsiderueshme, për shkak të numrit të madh të futbollistëve që marrin pjesë në Botëror me kombëtare të ndryshme.

Ky mekanizëm kompensimi pritet gjithashtu të ulë tensionet e vazhdueshme mes klubeve dhe federatave kombëtare gjatë periudhave ndërkombëtare.

Botërori më i madh në histori

Kupa e Botës 2026 do të jetë edicioni më i madh i organizuar deri më tani, me pjesëmarrjen e 48 kombëtareve.

Rritja e numrit të ekipeve do të sjellë edhe më shumë lojtarë të angazhuar nga klubet, duke bërë që fondi total i kompensimeve të jetë dukshëm më i lartë krahasuar me edicionet e mëparshme.

“KORÇA BOOM”