Gentjan Liço shpërthen me optimizëm: “Skënderbeu ka grupin dhe forcën për të fituar çdo ndeshje, Iliria nuk është përjashtim!”

Skuadra e Skënderbeut po përgatitet për sfidën e radhës kundër Ilirisë, një ndeshje që do të zhvillohet në fushën e tyre dhe që pritet të ketë rëndësi të veçantë për vazhdimësinë e sezonit. Zëvendës-trajneri i korçarëve, Gentjan Liço, ka shprehur besimin e tij të plotë tek grupi dhe ka theksuar se ekipi është në rrugën e duhur për të përmbushur pritshmëritë e stafit teknik dhe tifozëve.

“Kemi një grup të mirë, me futbollistë që kanë dëshirë të japin maksimumin në fushë. Ata e kanë të qartë atë që kërkojmë ne si staf teknik dhe sidomos objektivin që kemi për këtë sezon. Jam i bindur se ky ekip ka potencial të arrijë shumë,” – u shpreh Liço.

Ndaj Ilirisë, pritshmëritë janë të qarta: fitore. Lici nënvizoi se çdo ndeshje për Skënderbeun ka vetëm një qëllim, marrjen e tre pikëve:“Ne nuk mendojmë për asgjë tjetër përveç fitores. Kjo është ajo që kërkojmë në çdo përballje dhe jam i bindur sedo ta tregojmë këtë në fushë,” – tha ai.

Periudha e pushimit, sipas Liços, ka ardhur në momentin e duhur, duke i dhënë mundësi skuadrës të konsolidohet dhe lojtarëve të rinj të përshtaten me grupin. “Këto ditë pushimi kanë qenë të rëndësishme, sidomos për futbollistët që janë afruar së fundmi. Jam shumë optimist se ata do të shkrihen me pjesën tjetër të skuadrës dhe do të japin kontributin e tyre në vijim,” – theksoi zv/trajneri i Skënderbeut.

Në Korçë, atmosfera mbetet pozitive dhe mbështetja e tifozëve shihet si një faktor vendimtar për motivimin e lojtarëve. Me këtë qasje optimiste, Liço dhe stafi i tij duken të vendosur të ndërtojnë një skuadër konkurruese që synon të arrijë rezultate të rëndësishme këtë sezon.

“KORÇA BOOM”