Ish-deputeti Petro Koçi njofton ndarjen nga jeta të vëllait: “Beni ynë nuk ia doli dot”

“I dashuri ynë Beni nuk ia doli dot,” ka shkruar në një postim në rrjetet sociale ish-deputeti i Partisë Socialiste, Petro Koçi, duke njoftuar ndarjen nga jeta të vëllait të tij pas një lufte thuajse një vit e gjysmë me kancerin.

Ish-ligjvënësi bëri të ditur se vëllai i tij u nda nga jeta në orët e para të mëngjesit të sotëm, ndërsa shton se familjes së tyre do t’u mbetet “shpirti i përvëluar”.

Në postimin e tij, Koçi shkruan:

“Beni ynë nuk ia doli dot! Ndër pesë djemtë që shtuan familjen që krijuan babai dhe nëna jonë, Beni ishte i dyti. Lindi në Fier, më 13 shkurt 1964. Edhe pse u rrit në kushte të vështira, ai u shndërrua shpejt në një djalosh energjik dhe me shpirt sportiv.

Shkollën fillore e kreu në shkollën ‘Andon Xoxa’, më pas ndoqi një shkollë teknike për të përmbushur pasionin për fushat teknike dhe elektronike. Punoi për disa vite si teknolog në Azotikun e Fierit dhe dallohej për shpirtin krenar e të pastër.

Kur arriti moshën për të krijuar familje, ai sfidoi shoqërinë dhe mentalitetin e kohës duke u lidhur me shoqen e jetës, Vasilika Gjikopullin, mbesë e të pushkatuarit politik Milto Gjikopulli. Beni nuk iu nënshtrua as presioneve shoqërore, as atyre familjare, duke i qëndruar besnik zgjedhjes së tij shpirtërore.

Familja e re solli në jetë dy fëmijë, Xhinën dhe Vasilin. Hapja e kufijve e çoi Benin drejt emigracionit në Greqi, ku punoi me përkushtim për të siguruar të ardhurat për familjen. Pas disa vitesh u kthye në qytetin e lindjes, Fier.

Me duar të arta dhe shpirt punëtori të palodhur, vijoi të udhëhiqte familjen e tij fierake, por shëndeti i rënduar i bëri pritë të pabesë. Lufta me sëmundjen onkologjike zgjati gati një vit e gjysmë dhe përfundoi në agimin e ditës së sotme.

"KORCA BOOM"