Kampionët gati ti rrëmbejnë sulmuesin Skënderbeut

Edhe pse ka rënë një kategori më poshtë, pra në Kategorinë e Parë, kjo nuk do të thotë aspak se te Skënderbeu mungojnë lojtarët cilësorë. Këtë e vërteton lajmi më i fundit i mësuar nga kampionët, pra nga Egnatia, e cila është shfaqur e interesuar për sulmuesin Saleh Nasr të korçarëve.

Madje, palët kanë nisur edhe bisedimet konkrete. Nuk bëhet më fjalë vetëm për sinjale mediatike, por pritet që në ditët në vijim korçarët të japin edhe detajet e kushteve, nëse do të lejojnë largimin e këtij futbollisti drejt Egnatias.

Duhet theksuar se Egnatia është një nga ekipet më aktive në këtë merkato verore, dhe me afrimin e Nasrit synojnë të plotësojnë edhe më mirë organikën e skuadrës, pasi lojtari është shfaqur si një futbollist goli te Skënderbeu gjatë sezonit të kaluar.

Nga ana tjetër, klubi korçar e ka bërë të qartë se do të lejojë largimin e futbollistëve vetëm nëse plotësohen kushtet e tyre, të cilat janë, natyrisht, financiare.

“KORÇA BOOM”