Kartoni i kuq nuk e ndal Egnatian, kampionët shqiptarë marrin një barazim të vlefshëm

Egnatia ka hedhur një hap të rëndësishëm drejt raundit të dytë të eliminatoreve të UEFA Champions League, duke marrë një barazim të vlefshëm 1-1 në transfertë ndaj Petrocub, në ndeshjen e parë të raundit të parë.

Kampionët e Shqipërisë e nisën sfidën në mënyrën më të keqe të mundshme. Vetëm pak sekonda pas startit të takimit, një gabim në prapavijë mes kapitenit Aleksi dhe portierit Dajsinani u shfrytëzua nga Popesku, i cili kaloi vendasit në avantazh.

Megjithatë, skuadra e drejtuar nga Edlir Tetova reagoi me qetësi dhe kërkoi menjëherë golin e barazimit. Përpjekjet u shpërblyen në minutën e 35-të, kur pas një aksioni të bukur të ndërtuar nga Haimes dhe Kryeziu, ishte pikërisht ky i fundit që dërgoi topin në rrjetë për rezultatin 1-1.

Në fundin e pjesës së parë, Egnatia mbeti me 10 lojtarë. Kapiteni Aleksi u ndëshkua fillimisht me karton të verdhë, por pas rishikimit të episodit nga sistemi VAR, arbitri ndryshoi vendimin dhe e ndëshkoi me karton të kuq.

Në pjesën e dytë, Petrocub ushtroi presion të vazhdueshëm, por portieri Alen Sherri Dajsinani u shndërrua në protagonist, duke kryer disa pritje vendimtare që mbajtën në lojë kampionët shqiptarë. Edhe Egnatia krijoi raste për të shënuar golin e fitores, por nuk arriti t’i konkretizojë.

Në përfundim, sfida u mbyll në barazim 1-1, një rezultat që i jep avantazh psikologjik Egnatias për ndeshjen e kthimit.

Takimi vendimtar do të zhvillohet më 15 korrik në Rrogozhinë, ku kampionët e Shqipërisë do të synojnë të sigurojnë kualifikimin për në raundin e dytë të eliminatoreve të UEFA Champions League.

“KORÇA BOOM”