Lushnja-Skënderbeu të dielën/ Kapiteni Canka: Lushnja më e fortë, nuk i trembemi Skënderbeut

Lushnjarët bënë rezistencë në Pogradec duke marrë një rezultat pozitiv, në stadiumin “Gjorgji Kyçyku”, kundër liqenorëve.Skuadra e drejtuar nga Erion Xhafa bëri një paraqitje të mirë në premierën e kampionatit, duke marrë një pikë të çmuar në transfertë ndaj një kundërshtari të fortë, që në edicionin e kaluar “flirtoi” me Superioren.

Në një intervistë, kapiteni i lushnjarëve, Mikel Canka, u shpreh se Lushnja po punon mirë dhe me kujdes, duke dhënë shpresë për një sezon më të suksesshëm.

Canka, si e vlerësoni paraqitjen e Lushnjës në Pogradec?

Ishte një start shumë i mirë në këtë fillim-kampionati. Kemi në përbërje sportistë me përvojë, lojtarë me eksperiencë. Është një grup që ka për të bërë më mirë se vitin e kaluar.

Shkuat edhe te tifozët pas ndeshjes, cila është përshtypja juaj?

Është një plus i madh për skuadrën teksa shikon tifozët që e ndjekin qindra kilometra larg. Meritojnë respekt, sepse nuk shkuan me familjarët e tyre për të kaluar një fundjavë të bukur, por erdhën për të mbështetur ekipin e zemrës. Na qëndruan pranë për 90 minuta. Me tifozët tanë jemi shumë të fortë.

A ka një nivel më të lartë Lushnja e këtij edicioni, në raport me ekipin e vitit të kaluar?

Mendoj se Lushnja vit pas viti po kalon ato vështirësi që ka pasur disa sezone më përpara. Po punohet mirë dhe me kujdes.

Si e shikoni ndeshjen e radhës me Skënderbeun?

Do të jetë një ndeshje e fortë. Dihet që Skënderbeu është një skuadër shumë e fortë. Duhet ta respektojmë për atë çfarë ka dhënë në kampionatin shqiptar. Por, ne duhet ta shohim veten tonë të barabartë. Luajmë në të njëjtën kategori. Ekipet gjithmonë duhet të mendojnë që të jenë një “kockë e fortë” në fushën e tyre. Shpresoj që të bëjmë një ndeshje të mirë dhe të bukur me një lojë të fortë nga të dyja ekipet.

A është në gjendje kjo Lushnjë ta thyejë Skënderbeun?

E thashë edhe pak më lart. Luajmë në të njëjtën kategori. Po të japësh më të mirën në fushë, nuk duhet t’i trembesh kundërshtarit./ Panorama Sport

“KORÇA BOOM”