Mbi 120 mijë lekë në Tiranë, 40–60 mijë në qarqe të tjera/ Ku pozicionohet Korça?
Tirana vijon të ketë avantazhin më të madh në nivelin e pagave në Shqipëri, veçanërisht në sektorët e teknologjisë, financave dhe shërbimeve profesionale. Të dhënat rajonale të publikuara nga INSTAT për vitin 2024 tregojnë diferenca të dukshme të pagave mes qarqeve dhe aktiviteteve ekonomike.
Në kryeqytet, paga më e lartë regjistrohet në grupin që përfshin informacionin dhe komunikacionin, aktivitetet financiare dhe të sigurimit, pasuritë e paluajtshme, aktivitetet profesionale dhe shërbimet administrative. Paga mesatare në këtë grup i kalon 120 mijë lekë në muaj, dukshëm mbi nivelet e qarqeve të tjera.
Administrata publike, arsimi dhe shëndetësia renditen në vendin e dytë në Tiranë, me një pagë mesatare prej rreth 100 mijë lekësh. Në qarqet e tjera, këto aktivitete kryesojnë pothuajse pa përjashtim, me paga që luhaten kryesisht ndërmjet 80 dhe 87 mijë lekëve në muaj.
Ndërkohë, në sektorët e teknologjisë, financës dhe shërbimeve profesionale, paga në Tiranë kalon 120 mijë lekë, ndërsa në shumicën e qarqeve të tjera qëndron rreth 45–60 mijë lekë. Kjo tregon përqendrimin e vendeve të punës me paga të larta në kryeqytet.
Jashtë Tiranës, disa qarqe kanë rezultate më të mira në aktivitete të caktuara. Në Fier spikat industria nxjerrëse dhe përpunuese, energjia elektrike dhe uji, ku paga mesatare arrin rreth 75 mijë lekë. Në Durrës, pagat në informacion, financë dhe shërbime profesionale janë ndër më të lartat jashtë kryeqytetit, ndërsa tregtia, transporti dhe turizmi ndikojnë në nivelin e pagave.
Sa i përket Korçës, qarku renditet ndër zonat me nivele relativisht të ulëta pagash, së bashku me Beratin dhe Elbasanin. Në këto qarqe, pagat në një pjesë të madhe të aktiviteteve private luhaten afërsisht ndërmjet 40 dhe 60 mijë lekëve në muaj.
Kukësi dhe Dibra rezultojnë ndër qarqet me pagat më të ulëta në vend. Në tërësi, të dhënat tregojnë një hendek të dukshëm mes Tiranës dhe qarqeve të tjera, sidomos në sektorët me vlerë të shtuar dhe kërkesë të lartë për profesionistë të kualifikuar.
“KORÇA BOOM”
