Miliona euro të humbura nga platforma investimesh të rreme, hetimet e SPAK dhe Europol

E gjitha filloi me një kërkim të pafajshëm në Google. Një çift gjerman, në kërkim të mundësive për të investuar kursimet e jetës, u përfshi në një rrjet të ngatërruar mashtruesish ndërkombëtarë që vepronin nga call center-a të vendosura në Shqipëri. Por historia e Carina dhe Christoph Breunig nuk është e vetmja. Pas saj fshihet një industri kriminale e sofistikuar, me rrënjë në shumë vende dhe pasoja të thella njerëzore dhe financiare.

Një Skemë Që Fillon Me Një Telefonatë

Në pamje të parë, gjithçka ngjante normale: një faqe interneti e ndërtuar mirë, grafikë që lëviznin, bonuse që rriteshin, dhe një "ekspert investimesh" që të drejtonte hap pas hapi. Christoph transferoi fillimisht 250 euro. Më pas 750. Dhe në fund, 995 mijë euro – pothuajse një milion. Ai ishte i bindur se po investonte, kur në fakt po mashtronte veten ndërsa një grup kriminal i organizuar në Tiranë e boshtonte.

Personi në anën tjetër të telefonit nuk ishte një ekspert investimesh, por një i ri shqiptar që punonte për një kompani të quajtur "Blue Energy Call", një call center që përdorte emra të rremë dhe softuerë të personalizuar për të krijuar iluzionin e tregtisë online.

Krimi që Fshihet Pas Kompjuterit

Skemat e tilla janë aq të sofistikuara, saqë edhe investitorë me përvojë nuk e kuptojnë që po mashtrohen. Përmes softuerëve si Panda TS dhe Panda CRM – programe të dizajnuara për brokerë financiarë – mashtruesit krijonin faqe si "Globalix" dhe "Brokerz", ku viktimat mund të shihnin lëvizje të rreme në tregje që nuk ekzistonin.

Operatorët përdornin aplikacione si Anydesk për të marrë kontrollin e kompjuterëve të viktimave dhe për të marrë të gjitha të dhënat e tyre bankare, shpesh nën justifikimin e "asistencës teknike".

Një Industriale Kriminale Me Qendër në Shqipëri

Që nga viti 2019, Tirana është kthyer në një nyje të rëndësishme për këtë industri të krimit të organizuar. Aty, të rinj shqiptarë të papunë, shpesh të joshur nga paga të larta (600–1200 euro në muaj plus bonuse), punësohen për të mashtruar qytetarë të huaj në gjuhë të ndryshme. Për ta, fillimisht kjo është vetëm një punë. Por shumë shpejt e kuptojnë se janë pjesë e një mashtrimi masiv dhe përballen me dilema morale dhe ligjore.

"KORÇA BOOM"