Nga Ervin Baku: Tronditet futbolli botëror, Europa kërcënon të largohet nga garat e FIFA-s

UEFA dhe 55 federatat e saj anëtare kanë dalë me një qëndrim të përbashkët kundër propozimit të FIFA-s për t'u dhënë investitorëve privatë interesa pronësie mbi Kupën e Botës dhe kompeticionet e tjera ndërkombëtare.

Në deklaratë, UEFA e cilëson të papranueshme çdo përpjekje për ta kthyer Kupën e Botës në një aset investimi, duke theksuar se ajo është një pasuri e futbollit botëror, e ndërtuar ndër dekada falë kontributit të lojtarëve, ekipeve kombëtare dhe miliona tifozëve në mbarë globin. Sipas saj, ky kompeticion nuk është dhe nuk do të jetë kurrë në shitje.

Organizata europiane shpreh shqetësim edhe për mënyrën se si është paraqitur ky projekt, duke pretenduar se ai është hartuar pa konsultime reale me federatat kombëtare dhe pa transparencën e nevojshme. Për UEFA-n, kjo përbën një dështim të rëndë në mënyrën e drejtimit të futbollit botëror.

Sipas deklaratës, nëse investitorët privatë bëhen pjesë e pronësisë së garave të FIFA-s, çdo vendim i rëndësishëm për kalendarin ndërkombëtar, formatet e kompeticioneve apo zhvillimin e futbollit do të ndikohet nga interesat financiare dhe pritshmëritë e aksionerëve, duke lënë në plan të dytë interesin e lojës.

UEFA thekson se futbolli nuk mund të drejtohet nga logjika e fitimit ekonomik dhe se interesat e federatave, ligave, klubeve, futbollistëve dhe tifozëve duhet të mbeten prioritet.

Në deklaratë bëhet e ditur se, për aq kohë sa ky propozim mbetet në fuqi, asnjë ekip kombëtar i vendeve anëtare të UEFA-s nuk do të marrë pjesë në kompeticionet e FIFA-s.

Organizata kërkon tërheqjen e plotë të projektit dhe garanci se qeverisja apo garat e FIFA-s nuk do të hapen më për pronësi private.

Në përfundim, UEFA nënvizon se disa vlera nuk mund të tregtohen. Sipas saj, Kupa e Botës i përket futbollit dhe brezave që do ta trashëgojnë atë, ndërsa Europa do të vazhdojë ta mbrojë këtë parim pa asnjë kompromis.

“KORÇA BOOM”