Nga përjashtimi i disa anëtarëve tek linja e re politike, çfarë pritet sot në PD

Dy ditë para se Parlamenti i ri, i dalë nga zgjedhjet e 11 majit, të mblidhet për herë të parë, Partia Demokratike ka thirrur sot në orën 13:00 mbledhjen e kryesisë, ku pritet të përcaktohet linja politike që opozita do të ndjekë në këtë legjislaturë. Sipas njoftimit të shpërndarë nga zyra e shtypit të PD-së, mbledhja do të hapet me një fjalë të liderit të opozitës, Sali Berisha, i cili pritet të japë edhe sinjalet e para për strategjinë e grupit parlamentar demokrat.

Kryesia e PD-së përbëhet nga 18 anëtarë të zgjedhur nga Këshilli Kombëtar dhe 15 anëtarë ex officio, që kanë fituar këtë të drejtë në bazë të posteve të mbajtura në komisionet parlamentare gjatë legjislaturës së kaluar. Megjithatë, sipas burimeve të TCH, katër prej anëtarëve ex officio, të cilët nuk arritën të fitojnë mandatin e deputetit në zgjedhjet e fundit, nuk janë ftuar në mbledhjen e sotme. Bëhet fjalë për Helidon Bushatin, Dhurata Çupin, Zheni Gjergjin dhe Ferdinand Xhaferrajn.

Përjashtimi i tyre shihet si një sinjal i qartë se Partia Demokratike po kalon në një fazë të re organizimi të brendshëm, ku prioritet po i jepet strukturës së re parlamentare dhe atyre që do të kenë rol aktiv në sallën e Kuvendit. Ky zhvillim pritet të hapë debat mbi mënyrën se si opozita po ristrukturohet dhe mbi raportin mes figurave të vjetra dhe atyre që pritet të marrin më shumë përgjegjësi në legjislaturën e ardhshme.

Në këtë mbledhje pritet të diskutohet jo vetëm strategjia e përfaqësimit opozitar në Kuvend, por edhe mënyra e funksionimit të grupit parlamentar, qëndrimi ndaj qeverisë dhe format e aksionit politik brenda dhe jashtë sallës së Parlamentit.

“KORÇA BOOM”