Një jetë e lidhur me qytetin: Robert Damo mes sportit, dijes dhe Korçës

Prof. Dr. Robert Damo është një personalitet i spikatur si në sport, ashtu edhe në akademi dhe jetën publike. I lindur në vitin 1960, ai nuk është njohur vetëm si profesor dhe studiues i fushës së agronomisë dhe mjedisit, por edhe si ish-volejbollist me karrierë të gjatë dhe të suksesshme.

Karriera sportive e Robert Damos nisi në vitin 1973 dhe u shtri deri në vitin 1990. Ai luajti me Skënderbeun në një nga momentet më të arta të ekipit, kur në vitin 1974 u shpall Kampion Kombëtar.

Më vonë, Damo veshi edhe fanellën e Dinamos dhe u aktivizua në ekipin Kombëtar. Për disa vite radhazi, u rendit mes 10 sportistëve më të mirë shqiptarë sipas rubrikës së gazetës sportive "Përpara", e cila evidentonte talentet më të spikatura në rang kombëtar.

Në botën akademike, pas studimeve në Institutin e Lartë Bujqësor të Korçës dhe doktoraturës në Universitetin Bujqësor të Tiranës mbi plehërimin organo-mineral të panxharit të sheqerit, Robert Damo arriti titullin Profesor. Ai ka botuar studime të shumta shkencore brenda dhe jashtë vendit, duke lënë gjurmë të spikatura në fushën e agronomisë dhe mjedisit.

Përtej sportit dhe akademisë, Prof. Damo ka shërbyer edhe në qeverisjen lokale. Ai ka qenë Kryetar i Bashkisë së Korçës gjatë periudhës 2003–2007, duke udhëhequr zhvillime të rëndësishme për qytetin e juglindjes së Shqipërisë.

Me pasion për dijen dhe përkushtim ndaj komunitetit, Prof. Damo ka ndërtuar një karrierë që lidh mësimdhënien, kërkimin shkencor, sportin dhe shërbimin publik një shembull frymëzimi për brezat e rinj.

"KORCA BOOM"