Noka kritikon kolegët që shkojnë në Kuvend për foto, jo për opozitarizëm

Partia Demokratike zhvilloi dje mbledhjen e Grupit të PD-së, ku diskutuan për dy seancat e javës që vjen, të hënën dhe të enjten. Gjatë takimit me dyer të mbyllura, Flamur Noka u shpreh se nuk mund t’i diktojë vendimet Niko Peleshi apo Taulant Balla, duke theksuar rëndësinë e ruajtjes së autonomisë së opozitës në Kuvend.

Ai kritikoi edhe deputetët opozitarë që shkojnë në seancë me kostume dhe kollare të shtrenjta, të cilat sipas tij nuk lidhen me rolin e tyre si opozitë. “Ne jemi deputetë të opozitës dhe kemi të drejta që nuk i lëshojmë kurrë. Nuk mund të na diktojë askush një gjë që ka funksionuar për 35 vjet në Parlament,” tha Noka.

Sipas tij, Kuvendi është vend për përballje dhe jo për imazhe luksi. “Kush mendon se është në Kuvend për të ardhur me kostum 5 mijë euro apo kollare 2 mijë euro dhe për të bërë foto në foltore, nuk ka lidhje me nevojën që kanë qytetarët për rezistencë dhe betejë politike. Ne thjesht duam të mbrojmë të drejtat tona dhe nuk do të nënshtrohemi,” shtoi ai.

Deklaratat e Nokës nënvizojnë mesazhin e PD-së për të ruajtur rolin e opozitës në Kuvend dhe për të shmangur një fokus të panevojshëm te pamja apo imazhi, duke theksuar se prioritet është përfaqësimi i qytetarëve dhe përballja me vendimmarrësit.

"KORÇA BOOM"