“Nuk e kuptojmë pse e v*ranë” – familjarët e Edoardo Sarchit kërkojnë drejtësi

Vdekja e biznesmenit italian Edoardo Sarchi në zonën e Salarisë, në Tepelenë, vijon të mbetet një ngjarje e pazbardhur që ka tronditur jo vetëm familjen, por edhe opinionin publik. 44-vjeçari u gjet i vrarë mëngjesin e së shtunës, në datën 27 shtator, nga një autor ende i paidentifikuar.

Trupi i pajetë i Sarchit u gjet në vendin e quajtur “Dilan”, ndërsa hetuesit dyshojnë se viktima është qëlluar diku tjetër dhe më pas është zvarritur dhe hedhur në anën tjetër të rrugës. Rrethanat e vdekjes mbeten ende të paqarta dhe asnjë person nuk është vënë në pranga deri më tani.

Familjarët e viktimës kanë reaguar për herë të parë duke shprehur shqetësimin për mungesën e informacionit zyrtar nga autoritetet shqiptare. Riccardo Barbier, kushëriri i Edoardo Sarchit dhe pronar i një hoteli në zonën e Vareses në Itali, ka folur për gazetën La Repubblica, ku ka deklaruar se familja mëson për ngjarjen vetëm nga media dhe nuk ka ende asnjë njoftim të qartë nga autoritetet.

Ai ka theksuar se Edoardo ishte një njeri i qetë, i martuar dhe baba i dy fëmijëve. “Lajmet që marrim janë vetëm ato të publikuara nga gazetat lokale. Në televizion nuk ka asnjë informacion të qartë për ngjarjen. Është një dhimbje e madhe. Edoardo ishte një njeri i mirë, i sinqertë dhe i ndjeshëm,” është shprehur Barbier.

Më tej, ai ka ngritur dyshime në lidhje me ortakun e viktimës në biznes, duke thënë se mund të ketë ndodhur një konflikt me djemtë e tij. “Mendojmë se ka ndodhur diçka me dy fëmijët e ortakut të tij në biznes, ndoshta një grindje. Por vetëm hetimet mund ta sqarojnë të vërtetën. Presim të mësojmë motivet e këtij krimi të rëndë,” ka shtuar ai.

Familja Sarchi ndodhet aktualisht në Shqipëri në pritje të zhvillimeve të mëtejshme dhe hetimeve zyrtare. Gruaja e viktimës dhe disa kushërinj ndodhen pranë vendit të ngjarjes, ndërsa funeralet u zhvilluan të dielën.

Edoardo Sarchi kishte një lidhje të hershme me Shqipërinë. Ai ishte pjesë e një grupi sipërmarrës të krijuar nga familja Nidoli, me kompani ndërtimi të themeluara që para 30 vitesh. Babai i tij, Vittorio Sarchi, një figurë e njohur politike në komunën italiane të Luinos, kishte ndërruar jetë në vitin 2022.

“KORÇA BOOM”