Pas sherrit në Korçë, Saleh Nasr largohet nga qyteti, çfarë po ndodh me sulmuesin e Skënderbeut

Sulmuesi i Skënderbeut, Saleh Nasr, është larguar nga Korça, vetëm pak ditë pas një incidenti ku u përfshi në një konflikt fizik me disa të rinj. Ngjarja ndodhi para dy ditësh, dhe si pasojë e goditjeve të marra, lojtari përfundoi në spital, ku mori ndihmën mjekësore dhe u largua menjëherë pas stabilizimit të gjendjes shëndetësore.

Sipas burimeve të sigurta për “Korça Boom”, Nasr është zhvendosur në Durrës, ku është parë pranë Resortit “Tropikal”. Mësohet se ai ka zhvilluar një takim me presidentin e Skënderbeut, Ardjan Takaj, për të diskutuar të ardhmen e tij me klubin korçar.

Nga sa bëhet e ditur, vetë futbollisti ka kërkuar të largohet dhe të transferohet në një skuadër tjetër, por ende nuk ka një vendim përfundimtar nga ana e presidentit Takaj.

Situata mbetet e hapur, ndërsa pritet që ditët në vijim të jenë vendimtare për të ardhmen e Saleh Nasr, i cili nuk ka qenë pjesë e përgatitjeve të fundit të ekipit.

“KORÇA BOOM”