Pezullimi që tronditi sportin shqiptar/ Dinamo: “Nuk do lejojmë që një lojtare të poshtërohet

Pas ngjarjes së pazakontë që tronditi botën e volejbollit shqiptar, ekipi i vajzave të Dinamos ka reaguar zyrtarisht lidhur me pezullimin e volejbollistes braziliane Nayara Ferreira dhe kërkesën për zhvillimin e një testi për përcaktimin e gjinisë së saj.

Në një komunikatë për shtyp, klubi konfirmon se informacionet e publikuara në media janë të vërteta, duke theksuar se vendimi i Federatës Shqiptare të Volejbollit (FSHV) i ka ardhur papritur dhe pa asnjë sqarim zyrtar mbi arsyet apo bazën ligjore të kësaj mase.

“Jemi njohur me publikimet e fundit që i referohen vendimit të FSHV-së për pezullimin e një prej lojtareve tona dhe kërkesën për zhvillimin e një testi për përcaktimin e gjinisë. Konfirmojmë se informacionet janë të vërteta,” thuhet në reagimin e Dinamos.

Klubi thekson se Nayara Ferreira është një sportiste profesioniste me licencë zyrtare të FIVB-së dhe me një karrierë 15-vjeçare ndërkombëtare, duke përfaqësuar ekipe në disa shtete të botës, përfshirë edhe vendet e Bashkimit Europian.

Sipas Dinamos, kërkesa për një test të tillë është “ndërhyrje e ndjeshme ndaj dinjitetit dhe integritetit personal të sportistes” dhe se mungesa e një procedure të përcaktuar në aktet rregullative të FSHV-së ngre shumë pikëpyetje mbi mënyrën si është trajtuar çështja.

“Në mungesë të çdo elementi konkret apo procedure të përcaktuar, kjo kërkesë prek drejtpërdrejt dinjitetin e lojtareve dhe ngre shqetësime mbi standardet që duhet të respektohen në sportin modern,” – vijon reagimi.

Pavarësisht situatës, Dinamo deklaron se po bashkëpunon me institucionet përkatëse për ta trajtuar rastin në mënyrë të drejtë dhe të matur, duke ruajtur vlerat e sportit dhe respektin ndaj individit.

“Në sport, si në çdo fushë tjetër, transparenca, drejtësia dhe respekti ndaj individit janë themeli i çdo suksesi. Sporti duhet të bashkojë, jo të poshtërojë,” – përfundon komunikata zyrtare e klubit Dinamo.

"KORÇA BOOM"