POGRADEC/ Ja futbollistët që ishin në provë në miqësoren kundër Dinamos

Skuadra e Pogradecit ka zhvilluar një ndeshje miqësore ndaj Dinamos, në të cilën stafi teknik testoi disa futbollistë të ftuar në provë, si pjesë e përgatitjeve për sezonin e ri futbollistik. Kjo sfidë shërbeu si një mundësi për të parë nga afër lojtarët që mund të bëhen pjesë e grupit në vazhdim.

Ndër emrat që u aktivizuan në këtë miqësore ishin Fabio Hasa, një mesfushor që më herët ka qenë pjesë e Flamurtarit, si dhe Enes Kuka, ish-lojtar i Kastriotit, i cili po kërkon një rikthim të fortë në fushën e lojës pas një periudhe larg nivelit të lartë të garës. Të dy kanë treguar cilësi të mira gjatë ndeshjes, duke tërhequr vëmendjen e stafit teknik.

Po ashtu, në provë ishte edhe Sise, një futbollist afrikan me profil sulmues, i cili la përshtypje pozitive me lëvizshmërinë dhe fizikun e tij. Në këtë grup futbollistësh të testuar bën pjesë edhe Paulo Kasmollari, një element i ri që po kërkon hapin e radhës në karrierën e tij.

Stafi i Pogradecit është në fazën përfundimtare të vlerësimeve dhe në ditët në vijim do të merret vendimi për përfshirjen ose jo të këtyre lojtarëve në grupin zyrtar. Objektivi i klubit është të ndërtojë një skuadër konkurruese që të jetë e denjë për sfidat e kampionatit të ardhshëm.

“KORÇA BOOM”