Policia kap 46-vjeçarin që tregtonte armë, përdorte taksinë për t’iu shmangur kontrolleve

Finalizohet nga Komisariati i Policisë Nr. 4, në bashkëpunim me Seksionin e Trafiqeve të DVP Tiranë, operacioni policor i koduar “Gun Expert”, i ndjekur me metoda speciale hetimi.

Gjatë operacionit u sekuestruan katër armë zjarri të llojit pistoletë, municion luftarak, lëndë narkotike e llojit kokainë dhe pjesë të ndryshme armësh.

Në kuadër të operacionit u arrestua në flagrancë, në Rrugën e Dibrës, shtetasi A. C., 46 vjeç, banues në Tiranë, i cili drejtonte një automjet tip taksi. Sipas policisë, ai përdorte taksinë e tij për të shmangur kontrollet policore.

Gjatë kontrollit fizik, si dhe atij të automjetit dhe banesës, policia gjeti dhe sekuestroi katër armë zjarri me municion luftarak, që dyshohet se do t’u shiteshin grupeve kriminale, lëndë narkotike të llojit kokainë dhe pjesë të ndryshme armësh.

Të gjitha u sekuestruan në cilësinë e provës materiale, bashkë me automjetin që përdorej nga i arrestuari.

Shtetasi A. C. rezulton i implikuar edhe më parë në veprimtari të ngjashme kriminale.

Policia po vijon punën për identifikimin dhe kapjen e personave të tjerë të përfshirë në këtë aktivitet.

"KORCA BOOM"