Pse e katapultoi Edi Rama njeriun e Lulzim Bashës në krye të bashkisë Tiranë?

Çfarë fshehin të dhënat e sondazheve që nuk i pëlqejnë Edi Ramës?

Me urdhrin e Edi Ramës, Blendi Sulaj është emëruar në postin e nënkryetarit të bashkisë së Tiranës, me delegim territorin dhe zhvillimin urban.

Vendimi i emërimit të Blendi Sulajt por edhe 3 të tjerëve, është në thelb i paligjshëm, pasi sipas dispozitave për pushtetin vendor, nënkryetari, emërohet nga kryetari i bashkisë së Tiranës, për të qenë pjesë e ekzekutivit të tij në menaxhimin e punëve të përditshme.

Ligjërisht, nënkryetari nuk ka një rol vendimarrës, siç edhe kryetari i bashkisë nuk mund të marrë vendime, pasi të gjithë vendimet i merr Këshilli Bashkiak. I cili miraton Buxhetin, vendos taksat dhe miraton rregulloret e menaxhimit të punëve në territor.

Kryetari i bashkisë, nxjerr urdhëra dhe udhëzime, pikërisht për të zbatuar vendimet që ka marrë Këshilli Bashkiak.

Nënkryetari i bashkisë nuk ka asnjë rol, përveç delegimeve sipas sektorëve që ka caktuar kryetari, në zbatimin e urdhërave apo udhëzimeve me shkrim apo me gojë.

Emërimi i Blendi Sulajt, por edhe të tre nënkryetarëve të tjerë është praktikisht ilegjitim. Pasi ata- nënkryetarët, mund të emërohen vetëm me urdhër të sigluar e të protokolluar nga kryetari i bashkisë, i cili ligjërisht është Erion Veliaj.

Prokura e dhënë nga Veliaj, që në mungesë të tij, një nga nënkryetarët të udhëheqë punën e përditshme të bashkisë, ka të bëjë vetëm me disa detyra specifike.

Që do të thotë firmosjen e bordorove të punonjësve, firmosjen e kalimit të fondeve operative për shpenzimet që janë përcaktuar në buxhet, apo punët emergjente që kanë të bëjnë me lëvizjen e strukturës së përditshme administrative.

Anduela Ristani, që është nënkryetare e komanduar, nuk ka asnjë tagër ligjor për të bërë emërime, shkarkime, apo për të ndryshuar struktura të institucionit që ajo thjeshte e komandon, jo e përfaqëson.

Për t’u bërë këto, duhet urdhri i kryetarit të bashkisë, e asnjë hap i tillë ligjor nuk mund të merret pa firmën e vulën e kryetarit. 

Praktikisht, të gjitha zëvendësimet e bëra në drejtoritë në varësi të bashkisë Tiranë, që nga policia bashkiake, UKT apo ndërmarrjet e tjera, janë të gjitha të paligjshme. Madje më shumë se kaq, përfaqësojnë një puç institucional, që mund të hidhen poshtë fare lehtë, qoftë edhe nga Gjykata Administrative, pa pasur nevojën të shkojnë në Kushtetuese.

Por, Gjykata Kushtetuese, mund të jetë porta finale e dhënies së qartë të një dispozitivi detyrues për këtë shkelje të rëndë. Që të vihet në lëvizje korpusi i dretësisë, do të duhej një kërkesë e kryebashkiakut Veliaj, ose edhe një grupi qytetarësh.

Nëse ndodh kjo e dyta, sërish gjykata kompetente do të duhej të pyeste kryebashkiakun në detyrë, nëse i ka firmosur ai këto lëvizje apo jo.

Nëse Veliaj do të thoshte të vërtetën, pra që nuk ka autorizuar asnjë nga këto lëvizje, atëherë përveç rrëzimit të të gjitha vendimeve, mund të kërkohet përgjegjësia e atyre që e kanë shkaktuar këtë puç.

Ndërkohë, për të ardhur tek emërimi i Blendi Sulajt, ai deri pak kohë më pare ka qenë pjesë e Partisë Demokratike, përkatësisht në strukturat e Forumit Rinor të saj. Një strukturë që ka udhëhequr për një kohë të gjatë protestat para bashkisë së Tiranës, me Belind Këlliçin dhe Adriana Kalanë.

Por Sulaj, realisht nuk është parë në këto takime, pasi me ardhjen e Sali Berishës, ai është larguar dhe ka kaluar me grupin e Lulzim Bashës. Për të cilin ai organizoi forumin rinor dhe degën e njësisë 9 në Tiranë, ku zhvilloi edhe disa takime, kur Luli dilte me të famshmën bluzë të Zelenskit.

Ndërkaq, papritur, Sulaj, në marsin e këtij viti ka postuar në faqen e tij në rrjete sociale, një poster të Partisë Socialiste me dorën e pesë gishtave, që ishte edhe imazhi kryesor i Edi Ramës.

Asnjë sqarim nuk ka dhënë për këtë kërcim pindarik, por fakt është se Sulaj ishte pjesë e listës së hapur të kandidatëve për deputetë, të Partisë Socialiste në qarkun e Tiranës.

Ndryshe nga “demokratët e Vlorës” që u kthyen në karburant propagande për fushatën e PS-së, për “demokratët” e Tiranës nuk u fol fare.

Pasi siç duket Edi Rama e ka lënë për më vonë, për fushatën e Tiranës, ku siç duket boshllëkun e Veliajt, kërkon ta mbushë me atë të renegatëve të Sali Berishës dhe Lulzim Bashës.

Prej kohësh, mazhoranca, nëpërmjet lidhjeve të tyre mediatike, ka ndaluar çdo sondazh popullariteti për figurat publike në vend, të cilat bëheshin në mënyrë periodike çdo 6 muaj.

Ndërkaq, ka që prej arrestimit të Erion Veliajt, që nuk del në publik asnjë prej këtyre sondazheve, edhe pse mësohet se janë bërë çdo muaj, e ka të dhëna të pjaftueshme për të hartuar një raport.

Çfarë fshehin këto të dhëna që nuk i pëlqejnë Edi Ramës? Burimet e Pamfletit flasin për dy të dhënat kryesore, e para që e konsideron arrestimin e Veliajt si të lidhur me Ramën dhe e dyta popullariteti i kryebashkiakut nuk ka rënë. Janë të njëjtit njerëz që e urrejnë apo kundërshtojnë, të gjithë nga krahu opozitar. Shumica e socialistëve ka të njëjtën simpati, madje edhe një grup që i përket elektoratit gri. Pikërisht kjo është e dhëna që i jep ankth Ramës, pasi shikon që brenda qytetarëve dhe votuesve të mazhorancës, ka një perceptim jo të ndryshuar për Veliajn. Që do të thotë se kafshimi që i bëri nuk ka ngjitur, ndaj e ka vështirë për ta ngrënë plotësisht.

Nga ana tjetër, për të trazuar ujërat sjell një “demokrat-socialist” për ta shitur lëvizjen e tij si strategjike për të zgjeruar rrezën e elektoratit. Por vetëm me fjalë, pasi siç treguan edhe zgjedhjet e fundit, PS e vetë demokrati Sulaj nuk ka marrë asnjë votë të djathtë. /Pamfleti

“KORÇA BOOM”