Riorganizim në kabinetin qeveritar me shkarkime dhe emërime të reja në postet kyçe të ministrive

Qeveria shqiptare ka bërë ndryshime të rëndësishme në nivelet e larta drejtuese. Në mbledhjen e sotme të Këshillit të Ministrave është vendosur shkarkimi nga detyra i zëvendësministres së Shëndetësisë, Mira Rakacolli (Kapisyzi), një figurë e njohur për publikun veçanërisht gjatë periudhës së pandemisë Covid-19, ku pati një rol të spikatur në komunikimin institucional.

Në vend të saj, është emëruar Eugena Tomini, e cila nuk është një emër i ri për këtë post. Tomini ka shërbyer më herët si zëvendësministre e Shëndetësisë dhe ka mbajtur gjithashtu postin e drejtueses së Institutit të Shëndetit Publik (ISHP), duke sjellë në këtë rol një përvojë të gjatë në fushën e shëndetit publik.

Por ndryshimet në qeveri nuk u ndalën këtu. Këshilli i Ministrave vendosi gjithashtu shkarkimin e zëvendësministrit të Brendshëm, Andi Mahila, pas publikimit të një fotoje ku ai shihej duke pirë cigare në ambientet e mbyllura të një lokali, në kundërshtim me ligjin për ndalimin e duhanit në ambiente publike.

Në vend të Mahilës, është emëruar ish-deputetja e LSI-së, Silva Caka, e cila rikthehet në skenën politike me një pozicion drejtues në Ministrinë e Brendshme.

Ndërkohë, edhe Edona Bilali, ish-ministre dhe ish-deputete që mbeti jashtë Kuvendit në zgjedhjet e fundit, është emëruar në detyrën e zëvendësministres së Infrastrukturës dhe Energjisë.

Këto lëvizje vijnë në një moment kur kabineti qeveritar po përgatitet për një sezon të ri politik dhe institucional, ndërsa pritet të ketë dhe ndryshime të tjera në ditët apo javët në vijim.

“KORÇA BOOM”