“Rregullat e reja që po tronditin zyrat e këmbimit valutor / A do të mbijetojnë?”

Pikat e këmbimit valutor në Shqipëri do të funksionojnë nga tani sipas një kuadri të ri rregullator, i cili ka hyrë në fuqi më 15 shtator, me synimin për të kufizuar përdorimin e lartë të parasë fizike në ekonomi.

Sipas rregullores së re të miratuar nga Banka e Shqipërisë, zyrat e këmbimit valutor nuk do të mund të kryejnë më transaksione në cash për shuma mbi 2.5 milionë lekë. Çdo shumë që e kalon këtë vlerë duhet të realizohet përmes llogarive bankare.

Kjo masë është pjesë e një strategjie të përgjithshme që synon uljen e përdorimit të parasë fizike dhe kalimin drejt një ekonomie më të formalizuar.

Dritan Vakaj, përfaqësues i Shoqatës së Agjencive të Këmbimit Valutor, deklaroi:

"Kjo ndërhyrje është pjesë e politikave për të ulur përdorimin e cash-it. Në një ekonomi ku përdorimi i parasë fizike është i lartë, ky kufizim mund të paraqesë vështirësi operative, por ne besojmë se klientët dhe pikat e këmbimit do të përshtaten me kohën."

Përveç kufizimeve në transaksionet me para në dorë, janë forcuar edhe kriteret për licencimin e këtyre pikave. Kërkesa për kapital fillestar është rritur nga 2.5 milionë lekë në 5 milionë lekë.

Sipas Vakajt:

"Banka e Shqipërisë po përpiqet të forcojë sektorin dhe të sigurohet që zyrat e këmbimit të mbështeten në fondet e veta. Kjo kërkesë për kapital më të lartë ndihmon në shmangien e aktorëve të rrezikshëm dhe në parandalimin e pastrimit të parave apo financimit të terrorizmit. Kjo është një masë që ne si shoqatë e mirëpresim."

Ndër të tjera, rregullorja e re përcakton se një zyrë këmbimi nuk mund të mbajë në arkë më shumë se 5 milionë lekë në para fizike.

Këto ndryshime synojnë të rrisin sigurinë dhe transparencën në sektorin e këmbimit valutor, duke e përafruar atë me standardet ndërkombëtare të kontrollit financiar dhe luftës kundër informalitetit.

“KORÇA BOOM”