Rrënjët e Kolonjës/ Agim Rushiti, ose “Gigi” që bënte krenarë kolonjarët!

Agim Rushiti lindi më 4 shtator të vitit 1963 në qytetin e Ersekës, në zemër të Kolonjës. Që në moshë të vogël ai u lidh me futbollin, një pasion që do ta shoqëronte për më shumë se tri dekada.

Vetëm 11 vjeç ishte kur hodhi hapat e parë në fushën e gjelbër, duke nisur një rrugëtim sportiv që do të zgjaste deri në vitin 2003.

Në moshën 18-vjeçare u bë pjesë e ekipit të parë të KF Gramoz Ersekë, ku shumë shpejt u dallua për cilësitë e tij të veçanta në fushë. Ishte një lojtar i shpejtë, i vendosur dhe me një nuhatje të rrallë për golin. Topi dukej sikur e gjente vetë rrugën drejt rrjetës kur ishte në këmbët e tij.

Tifozët e thërrisnin me përkëdheli “Gigi”, një nofkë që u bë pjesë e identitetit të tij sportiv. Në tribunat e stadiumit të Ersekës shpesh dëgjohej emri i tij, ndërsa golat që shënonte ndiznin entuziazmin e tifozëve. Madje, për shkak të shpejtësisë së tij në fushë, tifozët i vunë edhe një tjetër epitet: “Gigi reja”, sepse në vrapimin e tij dukej sikur linte pas një re tymi.

Për vite me radhë ai u bë një nga figurat më të dashura të futbollit kolonjar. Me përkushtim dhe pasion të rrallë, Agim Rushiti i dha ekipit dhe tifozëve gjithçka që kishte: talentin, energjinë dhe shpirtin e garës. Sot mund të mungojnë statistikat e plota të golave të shënuar në kategoritë ku luajti Gramozi, por ata që e kanë parë në fushë e dinë mirë se shifrat do të kishin treguar një histori të madhe.

Në Kolonjë është e vështirë të gjesh dikë që nuk e njeh emrin e Agim Rushitit. Ai mbetet një nga ata sportistë që nuk kanë nevojë për shumë zhurmë për të lënë gjurmë. Një hero i heshtur i fushës së gjelbër, por një hero i madh në zemrën e çdo tifozi kolonjar.

Agim Rushiti – Gigi – është dhe do të mbetet një nga rrënjët e forta të sportit dhe krenarisë së Kolonjës.

“KORÇA BOOM”