Dhimitër Llogori, njeriu që nxori dhjetëra gazetarë: “Xhaxhi” që fitoi respektin e të gjithëve

Gëzuar ditëlindjen, Dhimitër Llogori, një nga telekronistët ikonë të Korçës e më gjerë!

Me Bolex-in në dorë, i palodhur dhe gjithmonë i gjendur aty ku kishte diçka për të dokumentuar, Dhimitër Llogori ka lënë gjurmë të veçanta në historinë e televizionit shqiptar.

Nga filmimet në fushat e lojës dhe aktivitetet e ndryshme, deri te garat e skive, ai ishte aty në çdo stinë dhe në çdo kohë, duke fiksuar me kamerën e tij momente që sot janë pjesë e kujtesës së qytetit dhe të sportit.

Një emër i nderuar dhe i respektuar, pjesë e një brezi që e shkroi historinë e televizionit shqiptar pas kamerës. Por kontributi i tij nuk u kufizua vetëm te puna si telekronist.

Me përvojën e tij të gjatë, Dhimitër Llogori ka ndihmuar dhe nxjerrë dhjetëra gazetarë të rinj, duke u mësuar atyre jo vetëm anën teknike të profesionit, por edhe korrektësinë, pasionin dhe dashurinë për televizionin. Për shumë prej tyre ai ka qenë një pikë referimi dhe një njeri që i ka udhëzuar në hapat e parë të karrierës.

Respekti që fitoi ndër vite ishte aq i madh, sa gazetarët e thërrisnin me dashamirësi “Xhaxhi”. Një thirrje që nuk ishte thjesht një nofkë, por një shenjë respekti, afërsie dhe mirënjohjeje për njeriun që kishte gjithmonë një këshillë, një ndihmë apo një fjalë të mirë për kolegët dhe brezat e rinj.

Por Dhimitër Llogori nuk ishte vetëm njeriu pas kamerës. Ai ishte edhe profesor, një mësues i përkushtuar që për vite me radhë u mësoi brezave të rinj në disa shkolla jo vetëm dije, por edhe pasionin për kamerën dhe profesionin.

Sot, në ditën e tij të lindjes, kujtojmë me respekt një profesionist, profesor dhe mik të shumë brezave të gazetarëve.

Edhe 100 vite, profesor Dhimitëri! Shëndet, jetë të gjatë dhe sa më shumë gëzime pranë njerëzve të dashur!

“KORÇA BOOM”