Salianji: Tirana meriton një kandidat të fortë politik, PD ka nevojë për riorganizim të thellë

Ish-deputeti i Partisë Demokratike, një nga zërat më të artikuluar brenda forcës opozitare, Ervin Salianji, është shprehur se për bashki të mëdha dhe me rëndësi strategjike si ajo e Tiranës, PD duhet të propozojë kandidatë me profil të lartë politik, në përputhje me nivelin e kundërshtarit.

I ftuar në emisionin “Breaking” në Top News, Salianji tha se përballë një figure si Ogerta Manastirliu, e cila ka një peshë të madhe politike dhe përfaqëson struktura të rëndësishme të mazhorancës, opozita duhet të dalë me një figurë të barasvlefshme politikisht.

Sipas tij, garat e forta, siç është Tirana, sidomos kur kundërshtari ka kandidatë me profil të lartë politik, duhej të kishin përballë kandidatë të ngjashëm. Por në kushtet ku ndodhet sot PD dhe marrëdhëniet me partitë e tjera të koalicionit, është e kuptueshme që të zgjidhen figura që janë përtej strukturave partiake.

Lidhur me dorëheqjen e një kryetari partie pas humbjes në zgjedhje, Salianji tha se kjo është një praktikë e shëndetshme në demokraci, por në rastin konkret, gjërat duhen parë ndryshe. Sipas tij, parimisht, në një sistem demokratik, kur humb zgjedhjet, largohet dhe i hapet rrugë një drejtimi të ri. Por në Shqipëri, për shkak të mungesës së zgjedhjeve të lira dhe të ndershme, është e nevojshme që opozita të ketë një drejtues që vazhdon të denoncojë padrejtësitë.

Ai shtoi se në këtë kuadër, Sali Berisha është i nevojshëm si figurë që mban të gjallë aksionin opozitar, megjithëse ka deklaruar se pas përfundimit të mandatit të tij në krye të PD-së, do të hyjë në garë në mënyrë të rregullt.

Në fund, Salianji theksoi se Partia Demokratike ka nevojë për një reformim të thellë, që duhet të fillojë nga strukturat më të ulëta deri në qendër. Sipas tij, riorganizimi duhet të nisë nga qelizat e partisë, nga seksioni e më lart, për të krijuar një PD funksionale dhe të përgatitur për garë reale.

“KORÇA BOOM”