Selin triumfon pas 120 ditësh, lë pas Mirin në finalen e madhe

Pas 120 ditësh izolim, sfidash dhe emocionesh të forta, “Big Brother VIP Albania 5” ka kurorëzuar fituesen e këtij edicioni. Balerina Selin është shpallur fituese e madhe, duke rrëmbyer çmimin prej 100 mijë eurosh falë votave të publikut.

Finalja e madhe u zhvillua mes katër finalistëve, ku në vendin e dytë u rendit këngëtari Armir Shahini, i njohur për publikun si Miri nga grupi West Side Family. Në vendin e tretë u pozicionua Mateo, ndërsa Rogerti u rendit i katërti.

Selin ishte një nga personazhet më të spikatur të këtij sezoni, duke u kthyer në kryefjalë të shtëpisë për dinamikat, debatet dhe rrugëtimin e saj të veçantë. Në fund, ishte pikërisht mbështetja e teleshikuesve që e çoi drejt triumfit.

Nga ana tjetër, Miri u konsiderua një nga konkurrentët më të fortë dhe më të komentuar, duke arritur deri në finale dhe duke qenë për shumëkënd një pretendent serioz për çmimin e madh.

Ky edicion i “Big Brother VIP Albania” u karakterizua nga aleanca të forta, përplasje të shumta dhe kthesa të papritura, duke e mbajtur publikun të angazhuar deri në momentet e fundit.

Në fund, ishte vota e publikut ajo që vendosi fituesen, duke vulosur një sezon plot spektakël dhe emocione.

“KORÇA BOOM”