Sherri i parë i madh mes dy banorëve korçarë brenda shtëpisë së BBVIP

Një incident i tensionuar është regjistruar së fundmi brenda shtëpisë së Big Brother VIP Albania, ku banorët Ilir Vrenozi dhe Juxhin Plovishti janë përfshirë në një përplasje të fortë verbale, e cila për pak sa nuk degjeneroi në dhunë fizike.

Sipas pamjeve që po qarkullojnë në rrjetet sociale, konflikti ka nisur pas një batute të bërë nga Juxhini, e cila nuk është pritur aspak mirë nga Iliri. Ky i fundit reagoi menjëherë me nervozizëm, duke u ngritur nga vendi dhe duke tentuar t’i afrohet, por u ndal në kohë nga ndërhyrja e banorëve të tjerë, të cilët shmangën përshkallëzimin e situatës.

Në kulmin e tensionit, Ilir Vrenozi dëgjohet duke bërtitur me tone të larta:“Nuk tallet dot kush me mua, ik zhduku!”, duke e rënduar edhe më shumë klimën emocionale brenda shtëpisë.

Ironikisht, përplasja ndodhi vetëm pak orë pasi Juxhini ishte futur në lojë. Gjatë hyrjes së tij, Iliri e kishte pritur me përqafim dhe ngrohtësi, çka e bën edhe më të papritur ndryshimin e menjëhershëm të raportit mes tyre brenda më pak se 24 orësh.

Fakti që të dy banorët janë nga Korça ka shtuar reagimet dhe komentet në rrjetet sociale, ku ndjekësit po spekulojnë mbi shkaqet reale të këtij shpërthimi të fortë dhe të papritur.

Mbetet për t’u parë nëse produksioni i Big Brother VIP Albania do të ndërhyjë me masa disiplinore dhe se si kjo ngjarje do të ndikojë në vazhdimësinë e lojës për dy banorët.

"KORCA BOOM"