Shtrohet në spital pak para sfidës me Serbinë

Pak ditë para ndeshjes së shumëpritur mes Shqipërisë dhe Serbisë, sulmuesi kuqezi Rei Manaj ka sjellë shqetësime në kampin kuqezi, pasi është shtruar në spital për shkak të një gjendjeje gripale të rënduar.

Burime pranë stafit mjekësor të Kombëtares bëjnë me dije se lojtari ka shfaqur simptoma të temperaturës së lartë, lodhje fizike dhe dobësi, çka ka detyruar mjekët ta dërgojnë për trajtim të specializuar në një qendër shëndetësore. Edhe pse nuk bëhet fjalë për një problem serioz mjekësor, situata e tij ka ngritur alarmin në prag të një prej sfidave më të rëndësishme për Shqipërinë në këtë fazë të eliminatoreve.

Gjendja e Manajt po monitorohet nga afër nga stafi i Kombëtares, me shpresën që ai të rikuperohet në kohë për të qenë i gatshëm për trajnerin Silvinjo. Megjithatë, nëse gjendja e tij nuk përmirësohet brenda dy-tre ditëve në vijim, ekziston mundësia reale që ai të mungojë në ndeshjen ndaj Serbisë, gjë që do të ishte një humbje e ndjeshme për repartin ofensiv të kuqezinjve.

Rei Manaj ka qenë në formë të mirë së fundmi dhe shihej si një alternativë e rëndësishme për fazën sulmuese të ekipit, sidomos në një përballje me peshë si ajo ndaj Serbisë, ku kërkohet forcë fizike, vendosmëri dhe përvojë.

“KORÇA BOOM”