Skënderbeu i bashkoi në lavdi, tani i ndan në pankina rivale, përballja e veçantë mes Ilir Dajës dhe Ivan Gvozdenoviçit ndez kuriozitetin e tifozëve

Në historinë e Skënderbeut ka emra që lidhen pazgjidhshmërisht me sukseset e klubit, dhe mes tyre spikasin Ilir Daja dhe Ivan Gvozdenoviç. Për korçarët, të dy përfaqësojnë një epokë të artë, secili me rolin e vet, por me një lidhje të përbashkët: lavdinë që ua dha ky klub.

Kur Ilir Daja udhëhiqte Skënderbeun drejt titujve kampion, Ivan Gvozdenoviç ishte një prej lojtarëve kyç që zbatonte në fushë idetë e trajnerit të tij. Ato vite të arta krijuan mes tyre një njohje të fortë, që shkon përtej marrëdhënies trajner–futbollist. Tashmë, vite më vonë, fati i sjell sërish përballë, por këtë herë në role të ndryshme: të dy si trajnerë.

Kjo e diel do t’i gjejë në krahë kundërshtarësh, dhe pyetja që lind natyrshëm është: a do të triumfojë nxënësi ndaj profesorit, apo do të shohim dy “profesorë” që matin forcat me njëri-tjetrin?

Çfarëdo të ndodhë, ajo që mbetet e padiskutueshme është fakti se Skënderbeu i madh u ka dhënë të dyve emrin dhe lavdinë që i shoqëron sot, një trashëgimi që asnjëri prej tyre nuk e mohon.

“KORÇA BOOM”