Tan Agolli ndërton restorant edhe në Korçë: Përse ka gjithmonë bar-restorant dhe hotel në projektet e FSHZH-së?!

Kreu i Fondit Shqiptar të Zhvillimit, Dritan Agolli, është bërë deri më sot “i paprekshëm”, pasi me projektet që ai ka ndërtuar dhe po ndërton, gjithmonë me fonde shtetërore apo me kredi të huaja që i paguajnë taksapaguesit, ai po shndërrohet në një oligark, duke bërë qoka për familjen dhe njerëzit që i qëndrojnë pranë. Në pjesën më të madhe të projekteve shtetërore të FSHZH-së ka gjithmonë një bar, restorant apo edhe hotel.

Ndërtesat që janë projektuar apo po ndërtohen anembanë Shqipërisë, duke filluar nga Tirana, Përmeti, Shkodra, Divjaka, Durrësi, Bulqiza, Saranda etj, kanë brenda ambiente luksi, të cilat nëse do t’i shohësh në makete ngjajnë më shumë si resorte dhe jo si ambiente shërbimi që i shërbejnë komunitetit. Në momentin që Fondi Shqiptar i Zhvillimit u krijua, fillimisht gjatë qeverisë “Berisha” e më pas u pasua nga “Rama 1”, ku megjithë rotacionin politik drejtimi iu besua sërish Benet Becit, misioni ka qenë zhvillimi i rajoneve apo qytezave të vogla.

FSHZH-ja ka ndërtuar rrugë rurale, trotuare dhe sheshe në qyteza dhe fshatra, madje edhe fasada apo edhe objekte utilitare për komunitetet. Fillimisht janë ndërtuar çerdhe, shkolla apo kopshte. Më pas parkime apo rrugë në qytetet e vogla të Shqipërisë, të cilat s’kanë pasur mundësi t’i ndërtonin me paratë që mblidhnin nga taksat.Por, koha kaloi dhe gjatë qeverisë “Rama 2, 3 e 4” misioni ka ndryshuar. Në drejtimin e FSHZH-së ka shkuar një ish-drejtor i madh i Bashkisë së Tiranës, Dritan Agolli, i cili ka qenë edhe CEO në një kompani private ndërtimi për shumë kohë. Tashmë objektivi i Agollit apo edhe atyre që e mbështesin është luksi, duke u ndalur te projektet anembanë Shqipërisë, duke synuar vendet dhe atraksionet turistike.

Sipas dokumenteve që disponon VoxNews, FSHZH-ja ka hapur një tjetër tender të diskutueshëm, pas projekteve në Sarandë dhe Divjakë, ku do të bëjë hotele me 5 yje. Bëhet fjalë për projektin mbështetje për ngritjen e poleve të zhvillimit të integruar rural në partneritet me njësitë e vetëqeverisjes vendore dhe aktorë të tjerë lokalë dhe qendrorë.

Tenderi është për ndërtimin e fermës së dijes dhe agroturizmit të mollëve, Korçë, faza e parë. Fondi limit për ndërtimin është 236 milionë lekë, ose rreth 2.4 milionë euro. Mësohet se financimi i këtij objekti është parashikuar në programet buxhetore për periudhën 2025-2027.

Por më shumë si mbështetje për njësitë e vetëqeverisjes vendore, duket se Dritan Agolli, po mendon sërish të kënaqë biznesmenë të ndryshëm. Lind natyrshëm pyetja, kush do t’a menaxhojë këtë agroturizëm?! Natyrisht ashtu siç ka ndodhur me të gjitha pasuritë publike, edhe ky ndërtim është i destinuar të shkojë te të njëjta duar, por kësaj herë investimi do të bëhet nga shteti dhe privati vetëm do t’a menaxhojë. Një tip mini koncesioni, ku deri më sot për të gjithë projektet e luksit, nuk ka një publikim apo sqarim se si do të funksionojë. Agolli tashmë mendon si një biznesmen, duke qenë se me turizëm merret djali dhe bashkëshortja e tij. Tashmë në krye të një institucioni shtetëror, ai ka bërë një mori ndërtesash, brenda të cilave ka bërë bare, restorante apo hotele.

VoxNews ka raportuar në vijimësi për projektet e FSHZH-së në Llixhat e Bënjës, në Sarandë, Vlorë apo edhe në rrethinat e Tiranë. Restorant dhe bar është bërë edhe në parkun Retro në Bulqizë, ku të gjitha ndërtimet janë bërë me paratë e taksave të shqiptarëve, të cilët po e shohin veten dita-ditës vetëm për të mbijetuar.

Pak kohë më parë, Agolli “kopjoi” biznesmenin Behgjet Pacolli, i cili para disa kohësh publikoi një mega projekt për një resort të stërmadh në zonën e plazhit dhe pishave në Divjakë. Kësaj herë, sërish me paratë e shqiptarëve, Agolli po ndërton një hotel, restorant, bar dhe pishinë në një zonë kodrinore.

Tashmë radha i erdhi Korçës, ku në zonat përreth qytetit do të ndërtohet një fermë e madhe me bare, restorante e gjithçka tjetër. “Ky projekt synon krijimin e një ferme moderne të mollëve, duke përdorur teknika të avancuara të bujqësisë dhe një dizajn arkitektonik që mbështet qëndrueshmërinë dhe integrimin në mjedisin natyror. Ferma e Mollëve do të jetë një vend i hapur për të gjithë. Për fermerët, do të ofrohet mundësi për të mësuar. Për konsumatorët, ferma do të sigurojë produkte të freskëta dhe të cilësisë së lartë, duke i siguruar konsumatorëve ushqim të shëndetshëm dhe të prodhuar lokalisht. Për turistët, ferma do të jetë një vend atraktiv turistik duke ofruar mundësi për rekreacion, edukim dhe gastronomi” thuhet në dokument.

Në dokumente, FSHZH shkruan se zona ku do të zhvillohet projekti i “Fermës së Dijes” ndodhet në afërsi të fshatit Qatrom, vetëm 5.4 km larg qytetit të Korçës. “Terreni ku do të ngrihet ferma e mollëve karakterizohet nga një topografi e lehtë, me tokë pjellore dhe akses ndaj burimeve të ujit. Zona është e pandërtuar dhe rrethohet nga një rrugë perimetrale e pashtruar. Ajo ndodhet shumë pranërrugës interurbane, por është e nevojshme një infrastrukturë rrugore për aksesin në Fermën e Mollëve” thuhet në dokument. Por, kush do t’i vjelë frytet?!/VoxNews 

“KORÇA BOOM”