U vendos sot në kishën e Kryeengjëjve Mikael dhe Gabriel kryqi i Ikonostasit

Kryqi u riprodhua sipas origjinalit, duke ruajtur të gjitha detajet që kishte, bazuar në versionin origjinal i cili ndodhet në Muzeun e Artit Mesjetar në Korçë.

Kryqi origjinal i përket ateliesë së mësues Kostandinit, i cili, bashkë me nxënësit e tij, ka pikturuar edhe ikonat e këtij ikonostasi. Ky kryq ka pësuar dëmtime të shumta gjatë kohës kur është vjedhur, duke humbur një pjesë të rëndësishme të dekorit dhe relievit të tij.

Projekti i këtij kryqi u realizua nga Minuel Çollaku, duke shfrytëzuar pamjet e kryqit që ndodhen në muze dhe dokumentacionin fotografik, ku dallohen detaje të tjera që mungojnë.

Me përkushtim dhe kujdes të veçantë, ai arriti të rindërtojë një pasqyrim sa më besnik të kryqit të vjetër.

Gdhendja u krye me mjeshtëri nga Nikolin Hanxhari, i cili imitoi me përpikmëri të gjitha detajet e imta të projektit, duke risjellë finesën dhe elegancën e veprës origjinale.

Kryqi është 170 cm i lartë dhe përbëhet nga katër pjesë, të cilat lidhen me njëra-tjetrën dhe formojnë këtë kompozim monumental. Ai përbëhet nga trupi bazë, ku është vendosur trupi i Krishtit, si dhe nga pjesët anësore ku janë vendosur katër Ungjillorët. Anash kryqit janë gdhendur ornamente floreale, gjethe, degë dhe lule, duke krijuar një harmoni të pasur zbukurimesh.

Tre pjesët anësore kanë secila nga pesë gjethe të mëdha të stilizuara, me majën e përfunduar në formën e një boçeje. Pjesa poshtë ka katër nga këto gjethe, por në përmasa më të vogla.

Anash kryqit, lart dhe poshtë, në të dyja anët janë të gdhendur dy diej dhe dy hëna; në hënat janë gdhendur dy fytyra dhe drita që del në formë rrezesh, një detaj shumë artistik.

Falënderojmë shumë për financimin e plotë z. Marsel Kovaci, i cili bëri të mundur realizimin e këtij projekti të rëndësishëm për trashëgiminë shpirtërore dhe artistike të kishës dhe të vendlindjes së tij, Vithkuqit.

Gjithashtu falënderojmë edhe Atë Dhimitrin Taqka Prifti për ndihmën e dhënë gjatë realizimit të këtij projekti.

“KORÇA BOOM”