Volejbollistja braziliane rrëfen: “Më shkatërruan shpirtërisht”

Një ngjarje e pazakontë ka tronditur sportin shqiptar. Volejbollistja braziliane Nayara Ferreira, që luan për ekipin e femrave të Dinamos, është detyruar t’i nënshtrohet një testi për përcaktimin e gjinisë, pas ankesave të ngritura nga dy ekipe rivale.

Ferreira ka thënë për Deutsche Welle se vendimi i Federatës Shqiptare të Volejbollit (FSHV) për ta pezulluar dhe për t’i kërkuar testin e gjinisë e ka lënë të tronditur dhe të shkatërruar emocionalisht.

“Ndjej sikur jam shkatërruar, sikur po humbas mendjen. Çdo ditë pyes veten pse më ndodhi kjo. Kam luajtur në shtatë vende, përfshirë edhe Arabinë Saudite, dhe askush nuk më ka bërë ndonjëherë një pyetje të tillë,” tha Ferreira.

Volejbollistja u pezullua në tetor, pasi dy ekipe paraqitën kërkesë zyrtare në FSHV për të verifikuar “performancën fizike natyrore” të saj. Gjatë kësaj kohe, ajo humbi tri ndeshje të rëndësishme me Dinamon.

Klubi i Dinamos e quajti vendimin absurd dhe fyese, duke theksuar se bëhet fjalë për një lojtare veterane me karrierë të gjatë ndërkombëtare.

Ferreira tha se pranoi të kryente testin vetëm për të ndihmuar klubin:“Nuk kam nevojë t’i dëshmoj askujt që jam grua, sepse jam grua. Kjo është 100%.”

Kapitenia e ekipit, Elena Bego, tha se lajmi i pezullimit e kishte tronditur gjithë skuadrën.“Të gjitha vajzat mbetëm pa fjalë. Ky rast është skandaloz. Ne e njohim Nayara-n dhe e mbështesim plotësisht,” u shpreh ajo.

Edhe trajneri i Dinamos, Orlando Koja, pranoi se mungesa e volejbollistes ka ndikuar edhe në rezultatet sportive të ekipit.

Ferreira, e prekur emocionalisht nga kjo përvojë, thekson se kjo çështje shkon përtej saj.“Mendoj se pas kësaj situate duhet të reflektojmë se çfarë do të thotë respekti. Me veprime të tilla, ata i shkatërrojnë gratë në sport,” përfundoi ajo.

Çështja e testeve të gjinisë në sportin e femrave është bërë temë e ndjeshme ndërkombëtarisht, pas debateve rreth boksieres algjeriane Imane Khelif dhe vendimeve të fundit të Federatës Botërore të Atletikës, që ka bërë të detyrueshme kontrollet e tilla për gratë që konkurrojnë në nivelet më të larta.

"KORCA BOOM"